Photos : ‘सरसेनापती हंबीरराव’ चित्रपटाची यशस्वी घौडदौड; बॉक्स ऑफिसवर जमवला इतक्या कोटींचा गल्ला

लेखक, दिग्दर्शक आणि अभिनेते प्रवीण विठ्ठल तरडे यांचा बहुचर्चित ‘सरसेनापती हंबीरराव’ हा चित्रपट २७ मेला सर्वत्र प्रदर्शित झाला. छत्रपती शिवाजी महाराज आणि छत्रपती संभाजी महाराज यांच्या काळात स्वराज्याचा सरसेनापती होण्याचा बहुमान मिळालेले हंबीरराव मोहिते यांच्या जीवनावर आधारित हा चित्रपट आहे. अभिनेता प्रविण तरडे यांनी या चित्रपटात सरसेनापती हंबीरराव मोहिते यांची भूमिका साकारली आहे. 'सरसेनापती हंबीरराव' चित्रपटात अभिनेता गश्मीर महाजनी छत्रपती शिवाजी महाराज आणि छत्रपती संभाजी महाराज अशा दुहेरी भूमिकेत आहे. मराठमोळी अभिनेत्री श्रुती मराठेने चित्रपटात महाराणी सोयराबाईंची भूमिका साकारली आहे. प्रदर्शनाच्या पहिल्याच दिवसापासून प्रेक्षकांकडून या चित्रपटाला भरघोस प्रतिसाद मिळतो आहे. चित्रपट पाहण्यासाठी प्रेक्षक चित्रपटगृहात गर्दी करताना दिसत आहेत. सोशल मीडियावरही 'सरसेनापती हंबीरराव' चित्रपटाची चर्चा आहे. चित्रपटातील कलाकारांचे कौतुक होताना दिसत आहे. 'सरसेनापती हंबीरराव' चित्रपटाची बॉक्स ऑफिसवरही जादू पाहायला मिळत आहे. या चित्रपटाने बॉक्स ऑफिसवर दमदार कमाई केली आहे. 'सरसेनापती हंबीरराव' चित्रपटगृहात प्रदर्शित झाल्यानंतर पहिल्या तीन दिवसांत या चित्रपटाने बॉक्स ऑफिसवर ८.७१ कोटींचा गल्ला जमवला. प्रदर्शनाच्या दुसऱ्या आठवड्यातही चित्रपटाची यशस्वी घौडदौड सुरूच आहे. अकरा दिवसांत या चित्रपटाने बॉक्स ऑफिसवर १८.२० कोटी रुपयांची कमाई केली आहे. (सर्व फोटो : सरसेनापती हंबीरराव, प्रविण तरडे/इन्स्टाग्राम)