Photos : ‘आश्रम ३’मधील भोपा स्वामी आहे तरी कोण?; ‘रंग दे बसंती’ चित्रपटातून केलं होतं बॉलिवूडमध्ये पदार्पण

एमएक्स प्लेअरवरील 'आश्रम ३' वेब सीरिज सध्या ओटीटीवर धुमाकूळ घालतेय. बॉबी देओल, आदिती पोहणकर, ईशा गुप्ता अशी तगडी स्टार कास्ट असलेल्या बहुचर्चित 'आश्रम' वेब सीरिजचा तिसरा सीझन ३ जून रोजी प्रदर्शित झाला. पहिल्या दोन सीझनप्रमाणेच 'आश्रम ३' देखील प्रेक्षकांच्या पसंतीस उतरत आहे. बाबा निराल्याच्या कर्मकांड, भ्रष्टाचार, हत्याकांडावर आधारित असलेली ही वेब सीरिज सर्वाधिक ट्रेण्डिंग राहिलेली आहे. वेब सीरिजमध्ये बॉलिवूड अभिनेता बॉबी देओल बाबा निरालाच्या भूमिकेत आहे. बाबा निरालाचा मित्र आणि अत्यंत जवळचा व्यक्ती म्हणजे भोपा स्वामी. भोपा स्वामी बाबा निरालाच्या प्रत्येक कर्मकांडात त्याला पुरेपूर साथ देताना दिसतो. 'आश्रम ३'मध्ये अतिशय हुशार असलेल्या भोपा स्वामीची भूमिका अभिनेता चंदन संन्यालने साकारली आहे. चंदनचा सीरिजमधील उत्तम अभिनय आणि संवादफेक कौशल्य प्रेक्षकांना त्याची दखल घेण्यास भाग पाडते. चंदन संन्याल एक उत्तम अभिनेता आणि मॉडेल आहे. त्याचा जन्म ३० जानेवारी १९८० रोजी बंगाली कुटुंबात झाला. भोपा स्वामीच्या भूमिकेमुळे प्रसिद्धीझोतात आलेल्या चंदनने 'रंग दे बसंती' या चित्रपटातून २००६ साली बॉलिवूडमध्ये पदार्पण केलं. या चित्रपटात छोटी भूमिका त्याच्या वाट्याला आली होती. परंतु, २००९ साली 'कमिने' चित्रपटातील त्याच्या भूमिकेने सगळ्यांचं लक्ष वेधून घेतलं. त्याच्या भूमिकेचं कौतुकदेखील झालं होतं. याशिवाय चंदन 'जज्बा', 'जब हॅरी मेट सेजल', 'जबरीया जोडी' या चित्रपटांतही झळकला आहे. हिंदीसोबतच चंदनने बंगाली चित्रपटातंही काम केलं आहे. 'महानगर कोलकाता' या चित्रपटातून त्याने २०१० साली बंगाली चित्रपटसृष्टीत पदार्पण केलं. 'अपरिजिता तुम्ही' या चित्रपटामुळे त्याला बंगाली चित्रपटसृष्टीत ओळख मिळाली. अनेक वेब सीरिजमधूनही चंदन वेगवेगळ्या भूमिका साकारताना दिसला. परंतु, 'आश्रम' मधील भोपा स्वामीच्या भूमिकेने त्याला विशेष ओळख मिळवून दिली. 'आश्रम ३' वेब सीरिज इतकीच भोपा स्वामीची भूमिकाही प्रेक्षकांच्या पसंतीस उतरत आहे. भोपा स्वामी भूमिकेमुळे चंदनच्या चाहत्यांमध्येही दिवसेंदिवस वाढ होताना दिसत आहे. (सर्व फोटो : चंदन संन्याल /इन्स्टाग्राम)