“त्या काळी पुरुष अभिनेते…” प्रसिद्ध अभिनेत्रीचा धक्कादायक खुलासा

१९८५ साली प्रदर्शित झालेल्या ‘राम तेरी गंगा मैली’ चित्रपटामुळे प्रसिद्धीझोतात आलेली अभिनेत्री म्हणून मंदाकिनी यांना ओळखले जाते. या चित्रपटामुळे त्या एका रात्रीत स्टार बनल्या होत्या. या चित्रपटात मंदाकिनी यांचा बोल्डनेस पाहून प्रेक्षक हैराण झाले होते. राज कपूर दिग्दर्शित या चित्रपटात मंदाकिनी यांनी राजीव कपूरबरोबर महत्वाची भूमिका साकारली होती. या चित्रपटात त्यांच्या अभिनयापेक्षा त्यांनी दिलेल्या बोल्ड सीन्सचीच चर्चा अधिक रंगली होती. मंदाकिनी यांनी १९८५ साली ‘मेरे साथी’ या चित्रपटातून पदार्पण केलं होतं. मात्र त्यानंतर त्या फारशा चित्रपटात झळकल्या नाहीत. मंदाकिनी यांनी 'पिंकविला'ला दिलेल्या मुलाखतीत सिनेसृष्टीतील कारकिर्दीबद्दल भाष्य केले. यात त्या म्हणाल्या, "आमच्या काळात मुख्य भूमिकेतील नायकांपेक्षा नायिकेला फार कमी किंवा काहीही महत्त्व दिलं जात नव्हते." "कित्येकदा आमचा चुकीच्या पद्धतीने वापर केला जायचा." "आमच्या वेळी चित्रपटातील नायिकेला फारशी मागणी दिली जात नव्हती. केवळ काही गाण्यांपुरती किंवा रोमँटिक सीनसाठी तिला चित्रपटात घेतले जायचे." "त्याकाळी पुरुष अभिनेते चित्रपटात महिला अभिनेत्री कोण असणार हे ठरवत असे." "पुरुष नायकांना जर एखाद्या नायिकेसोबत काम करायचे नसेल तर तिला ते स्पष्ट शब्दात नकार द्यायचे." "हिला घेऊ नका, असे ते त्यावेळी स्पष्ट भाषेत सांगायचे आणि दिग्दर्शक-निर्मातेही त्यावर संमती दर्शवायचे."