Photos : DDLJ चित्रपटात हिट झालेले गाणे तब्बल २३ वेळा झाले होते रिजेक्ट, जाणून घ्या यामागची रंजक गोष्ट

भारतीय चित्रपटाच्या इतिहासातील सर्वात लोकप्रिय आणि सर्वात जास्त काळ चित्रपटगृहात चालणारा चित्रपट म्हणजे डीडीएलजे, अर्थात 'दिलवाले दुल्हनिया ले जायेंगे'. ९० च्या दशकात मोठ्या पडद्यावरील राज आणि सीमरनच्या या प्रेमकहाणीला लोकांनी पसंती दर्शवली. तब्बल २५ वर्षं या चित्रपटाने चित्रपटगृहांवर राज्य केलं. मुंबईच्या 'मराठा मंदिर'मध्ये अजूनही या चित्रपटाचा एक शो दाखवला जातो. चित्रपटातील शाहरुख काजोल ही जोडी लोकांनी अक्षरशः डोक्यावर घेतली. हा रेल्वे स्टेशनवरील सीन तर अजरामर झाला. यावर नंतर प्रचंड जोक्सदेखील व्हायरल झाले. शाहरुख खानला रोमान्स किंग बनवण्यात या चित्रपटाचा मोठा वाटा आहे. अभिनय, दिग्दर्शन याबरोबरच या चित्रपटाची आणखीन एक जमेची बाजू होती ती म्हणजे यातील श्रवणीय गाणी. ही गाणी आजही लोकांच्या स्मरणात आहेत. यातील सगळी गाणी सुपरहीट ठरली. जतिन ललित ही संगीतकारांची जोडी आणि बरोबर आनंद बक्षी यांचे शब्द यांनी अक्षरशः जादू केली. यातील सर्वात जास्त लोकप्रिय झालेलं गाणं म्हणजे काजोलवर चित्रित झालेलं 'मेरे ख्वाबोंमें जो आये'. या गाण्यामागील किस्सा म्हणजे हे गाणं २३ वेळा नाकरलं गेलं होतं. गीतकार आनंद बक्षी यांनी हे गाणं तब्बल २३ वेळा लिहिलं आणि ते न आवडल्याने आदित्य चोप्राने ते प्रत्येकवेळी नाकारलं. त्यानंतर जेव्हा आनंद बक्षी यांनी त्यात बदल केले आणि मग ते गाणं फायनल झालं आणि हे गाणं सुपरहीट ठरलं. 'डीडीएलजे' हा चित्रपट भारतीय चित्रपटसृष्टीतील उत्तम प्रेमकहाणी म्हणून गणला जातो. या चित्रपटाने बॉक्स ऑफिसवर तर सगळे रेकॉर्ड मोडीत काढलेच, शिवाय यामध्ये प्रत्येक कलाकाराला एक स्वतंत्र ओळख मिळवून दिली. (फोटो सौजन्य : इंडियन एक्सप्रेस आणि फेसबुक)