अमिताभ बच्चन यांनी पहिल्या चित्रपटासाठी घेतले होते ‘इतके’ मानधन, जाणून घ्या

बॉलिवूडचे महानायक अर्थात अमिताभ बच्चन यांचा आज ८० वा वाढदिवस. बॉलिवूडचे शहेनशहा म्हणून राज्य गाजवणाऱ्या अमिताभ बच्चन चार दशकांहून अधिक काळ मनोरंजनसृष्टी गाजवली. बिग बी यांची लोकप्रियता आजही कायम आहे. अमिताभ बच्चन यांना बॉलिवूडचे महानायक याबरोबरच अँग्री यंग मॅन म्हणूनही ओळखले जाते. ७० ते ८० च्या दशकात अमिताभ बच्चन यांनी अनेक सुपरहिट चित्रपटात काम केले. त्यांनी आतापर्यंतच्या कारकिर्दीत १८० हून अधिक चित्रपटात विविध भूमिका साकारल्या. अमिताभ यांनी सिनेसृष्टीत पदार्पण करण्याच्या काळात ‘भुवन शॉ’, ‘सात हिंदुस्तानी’ हे चित्रपट केले. हे त्यांच्या कारकिर्दीतील अगदी सुरुवातीचे चित्रपट होते. त्यानंतर ‘जंजीर’, ‘कुली’, ‘लावरिस’, ‘त्रिशूल’, ‘खून-पसीना’, ‘कालिया’, ‘अग्नीपथ’, ‘काला पथ्थर’, ‘डॉन’ या चित्रपटांमध्ये ते झळकले. विशेष म्हणजे त्यांचे सर्वच चित्रपट हे त्याकाळी प्रचंड हिट ठरले. या सगळ्या चित्रपटांमधून वेळोवेळी बदलती समाजव्यवस्था, राजकारण, समाजकारण, आणि वाढती गुन्हेगारी यांचे चित्रण झाले. त्यामुळे अमिताभ बच्चन यांना हिंदी चित्रपटसृष्टीतील एक नवा प्रवाह निर्माण केला होता. वयाच्या ८० व्या वर्षीही ते अफलातून अभिनय करताना दिसतात. सध्या ते एका चित्रपटासाठी कोट्यावधी रुपये मानधन आकारतात. पण त्यांनी पहिल्या चित्रपटासाठी किती मानधन घेतले होते तुम्हाला माहित आहे का? कोट्यवधी रूपयांची कमाई करणाऱ्या महानायक अमिताभ बच्चन यांनी पहिल्या चित्रपटासाठी फक्त पाच हजार रूपये मानधन घेतले होते. एका मुलाखतीदरम्यान त्यांनी याबद्दल खुलासा केला होता. ‘सात हिंदुस्तानी’ या चित्रपटातून अमिताभ यांनी बॉलिवूडमध्ये पदार्पण केलं होतं. या चित्रपटासाठी त्यांना फक्त ५ हजार मानधन मिळालं होतं. बॉलिवूडमधील पदार्पणातील आपली ही पहिली कमाई असल्याचे त्यांनी यावेळी सांगितले होते. अमिताभ यांना ‘सात हिंदुस्तानी’ या चित्रपटाने पहिला राष्ट्रीय पुरस्कार मिळवून दिला. अमिताभ बच्चन यांच्या ‘जलसा’ आणि ‘प्रतीक्षा’ या बंगल्यांची किंमत आज २०० कोटींपेक्षा जास्त आहे. तसेच चित्रपट-जाहिरात क्षेत्रातून ते कोट्यावधी रुपये कमावतात. त्यानंतर १९८४ मध्ये ‘पद्मश्री’, २००१ मध्ये ‘पद्मभूषण’ आणि २०१५ मध्ये ‘पद्मविभूषण’ पुरस्काराने गौरविण्यात आले. तसेच चौदा फिल्मफेअर पुरस्कारही त्यांच्या नावे आहेत. अभिनयाखेरीज पार्श्वगायक, चित्रपटनिर्माते आणि टीव्ही कार्यक्रम निर्माते म्हणूनही बच्चन यांनी काम केले आहे. १९८४ ते १९८७ या काळात ते लोकसभेवर निवडूनही गेले होते.