Photos : वेगळे विषय हाताळणाऱ्या झोया अख्तरला ‘या’ चित्रपटातून मिळाली दिग्दर्शक व्हायची प्रेरणा

बॉलिवूडमधील आघाडीची दिग्दर्शिका म्हणून झोया अख्तर हे नाव चटकन आपल्या तोंडी येतं. आई अभिनेत्री, वडील प्रसिद्ध लेखक आणि विवध कलागुण असलेला भाऊ अशा परिवारात झोयाला चित्रपटाची आवड निर्माण होणं ही काही वेगळी गोष्ट नाही. लेखक, कवि, चित्रपटसृष्टीतील कलाकार यांच्या सानिध्यात लहानाची मोठी झालेली झोया हिने ‘लक बाय चान्स’ या चित्रपटातून दिग्दर्शक म्हणून पदार्पण केलं. झोयाला वैद्यकीय क्षेत्रात आणि लॉमध्ये करियर घडवायची इच्छा होती. पण ते शक्य न झाल्याने झोयाने मोर्चा चित्रपटनिर्मितीकडे वळवला. पण झोयाला खरी ओळख ही ‘जिंदगी ना मिलेगी दोबारा’ या चित्रपटातून मिळाली. ‘जिंदगी ना मिलेगी दोबारा’ प्रमाणेच झोय आता ‘जी ले जरा’ या चित्रपटावर काम करत आहेत. यातही ३ मैत्रिणींची गोष्ट बघायला मिळणार आहे. आलिया भट्ट, प्रियांका चोप्रा आणि कतरिना कैफ या तिघी यामध्ये प्रमुख भूमिकेत दिसणार आहेत. प्रसिद्ध दिग्दर्शिका मीरा नायर यांच्या ‘सलाम बॉम्बे’ हा चित्रपट पाहून झोयाला प्रेरणा मिळाली. त्या एका चित्रपटाने झोयाचा चित्रपटक्षेत्राकडे बघायचा दृष्टिकोनच बदलला. आता झोया शाहरुख खानची मुलगी सुहाना खान आणि अमिताभ बच्चन यांचा नातू अगस्त्य यांना घेऊन एक वेबसीरिज करणार आहे. लवकरच ती नेटफ्लिक्स या ओटीटी प्लॅटफॉर्मवर प्रदर्शित होईल. (फोटो सौजन्य : इंडियन एक्सप्रेस)