खास ‘या’ व्यक्तीला भेटण्यासाठी प्राजक्ता माळीची राज ठाकरेंच्या दीपोत्सव कार्यक्रमात हजेरी; पाहा Photos

मराठी सिनेसृष्टीतील आघाडीच्या अभिनेत्रींमध्ये प्राजक्ता माळीचं नाव आवर्जून घेतलं जातं. चित्रपट आणि टीव्ही रिअलिटी शोमुळे नेहमीच चर्चेत राहणारी प्राजक्ता माळी आपल्या बिनधास्त वक्तव्यांमुळेही बरेचदा चर्चेत असते. तिच्या काही पोस्टवरून तिला बरेचदा नेटकऱ्यांच्या ट्रोलिंगलाही सामोरं जावं लागलं आहे. प्राजक्ता सोशल मीडियावर बरीच सक्रिय असते. मात्र तिच्या सध्याच्या पोस्टने सर्वांचंच लक्ष वेधून घेतलं आहे. यासाठी कारणही खूपच खास आहे. महाराष्ट्र नवनिर्माण सेनेच्यावतीनं शिवाजी पार्कमध्ये आयोजित करण्यात आलेल्या दीपोत्सवाचं मुख्यमंत्री एकनाथ शिंदे यांच्या हस्ते उद्घाटन करण्यात आलं. या उद्घाटनाच्या कार्यक्रमाला एकनाथ शिंदेेंबरोबरच उपमुख्यमंत्री देवेंद्र फडणवीस आणि मनसे अध्यक्ष राज ठाकरे हे एकाच मंचावर दिसून आले. या दीपोत्सवाच्या निमित्ताने प्राजक्ताने मनसे अध्यक्ष राज ठाकरे आणि त्यांच्या परिवाराची भेट घेतली आहे. राज ठाकरे यांनी स्वतः तिला निमंत्रण दिलं होतं. यासंबंधीचे फोटो प्राजक्ताने आपल्या इन्स्टाग्राम अकाउंटवर शेअर केले आहेत. तिने पोस्टच्या कॅप्शनमध्ये म्हटलंय, “महाराष्ट्र नवनिर्माण सेनेच्या” शिवाजी पार्क येथील “दीपोत्सवाच्या” निमित्ताने पदरात पडलेले काही खास क्षण… यावेळी तिने दीपोत्सवाचे आमंत्रण दिल्याबद्दल तसेच, केलेल्या पाहूणचारासाठी राज ठाकरे, अमित ठाकरे, शर्मिला ठाकरे आणि अमेय खोपकर यांचे आभार मानले आहेत. यावेळी प्राजक्तासह पांडुरंग कांबळी, संतोष जुवेकर, विशाखा सुभेदार, अशोक सराफ, निवेदिता सराफ, संजय नार्वेकर, वंदना गुप्ते आदी कलाकार उपस्थित होते. कॅप्शनमध्ये ती म्हणाली आहे, "दीपोत्सव बघून इतकी भारावून गेले की फोटो काढायचे विसरले… त्यामुळे नेमके ते फोटोज् नाहीत..असो पण.. 'किआन'बरोबर फोटो काढला…(त्याला भेटायचच होतं…)" दरम्यान, प्राजक्ताच्या या पोस्टनंतर, ती महाराष्ट्र नवनिर्माण सेनेत प्रवेश करणार आहे का? असा प्रश्न नेटकऱ्यांना पडला आहे. या दीपोत्सव कार्यक्रमाच्या दरम्यान राज हे त्यांचा नातू किआनला घेऊन अनेक वेळा दिसले. अगदी उद्घाटनाच्या प्रसंगीसुद्धा ते किआनला कडेवर घेऊन उभे होते. उपमुख्यमंत्री देवेंद्र फडणवीस यांनीही किआनबरोबरचा फोटो शेअर केला आहे. (सर्व फोटो : इन्स्टाग्राम)