Tunisha Sharma Birthday: तुनिषा शर्मा ‘असा’ साजरा करणार होती वाढदिवस; दिवंगत अभिनेत्रीला चाहते देतायत शुभेच्छा

अभिनेत्री तुनिषा शर्माने २४ डिसेंबर रोजी मालिकेच्या सेटवर गळफास घेत जीवन संपवलं. तिच्या निधनाला आता १० दिवस झाले आहेत. आज तुनिषाचा २१ वा वाढिदवस आहे. पण त्याआधीच अभिनेत्रीने जीवन संपवण्याचा निर्णय घेतला. तुनिषाने आत्महत्या का केली? याबद्दल पोलीस तपास करत आहेत. अशातच तिच्या आत्महत्येप्रकरणी तिचा बॉयफ्रेंड आणि सह-कलाकार शिझान खान कोठडीत असून त्याची चौकशी केली जात आहे. दरम्यान, अभिनेत्रीच्या वाढदिवसानिमित्त तिचे चाहते भावूक झाले आहेत. ते सोशल मीडियावर पोस्ट करत तिला शुभेच्छा देत आहेत. तुनिषाचा जन्म ४ जानेवारी २००२ साली झाला होता. तुनिषाने बालकलाकार म्हणून अभिनय क्षेत्रात काम करायला सुरुवात केली होती. तिने अनेक चित्रपट आणि मालिकांमध्ये काम केलं होतं. आत्महत्या केली तेव्हा ती सोनी सब टीव्ही मालिका अली बाबा: दास्तान-ए-काबुलमध्ये तुनिशा राजकुमारी मरियमची भूमिका साकारत होती. तुनिशा ‘फितूर’, ‘बार बार देखो’, ‘कहानी २: दुर्गा रानी सिंह’, ‘दबंग ३ ‘ यांसारख्या चित्रपटांमध्येही दिसली होती. तुनिषाने ‘फितूर’ आणि ‘बार बार देखो’ मध्ये तरुण कतरिना कैफची भूमिका साकारली होती. कलर्स टीव्हीवरील तिची ‘इंटरनेट वाला लव्ह’ ही मालिका लोकांना खूप आवडली होती. तुनिषाला तिच्या वाढदिवसाचं जंगी सेलिब्रेशन करायचं होतं. तिने मित्र विनीत रैनाला याबद्दल सांगितलं होतं. माझ्या वाढदिवसाला आपण पार्टी करू, असं ती विनीतला म्हणाली होती, पण त्यापूर्वीच तिने आत्महत्या करून जीवन संपवलं. (सर्व फोटो - तुनिषा शर्मा इन्स्टाग्राम)