“आमच्या दोघांमध्ये भांडण…” अमिताभ बच्चन यांच्याबरोबरच्या नात्याबद्दल शत्रुघ्न सिन्हा स्पष्टच बोलले

ज्येष्ठ अभिनेते शत्रुघ्न सिन्हा यांना बॉलिवूडचे शॉटगन म्हणून ओळखलं जातं. शत्रुघ्न सिन्हा हे चित्रपटात आणि खऱ्या आयुष्यातही डॅशिंग आहेत. सर्वांना 'खामोश' करणारे बॉलिवूडचे ज्येष्ठ अभिनेते शत्रुघ्न सिन्हा आणि अमिताभ बच्चन यांचं नात जगजाहीर आहे. त्या काळात शत्रुघ्न सिन्हा आणि अमिताभ बच्चन यांच्या दोघांमध्ये जराही पटायचं नाही. या दोघांमध्ये पडद्यामागे कायमच संघर्ष पाहायला मिळायचा. पण शत्रुघ्न सिन्हा किंवा अमिताभ बच्चन या दोघांनीही यावर कधीच जाहीरपणे वक्तव्य केलं नाही. मात्र आता एका मुलाखतीत शत्रुघ्न सिन्हा यांनी यावर थेटपणे भाष्य केले. कोलकातामध्ये आयोजित केलेल्या 'साहित्य आजतक २०२३' या कार्यक्रमात शत्रुघ्न सिन्हा यांनी हजेरी लावली. यावेळी त्यांनी चित्रपट, सिनेसृष्टी, बॉयकॉट या विषयांसह विविध विषयांवर मनमोकळेपणाने संवाद साधला. या कार्यक्रमात त्यांना अमिताभ बच्चन यांच्याबरोबर असलेल्या नात्याबद्दल विचारणा करण्यात आली. ७०-८० च्या दशकात दोन मोठ्या कलाकारांमध्ये आपआपसात अनेकदा संघर्ष असल्याचे बोललं जायचं, हे खरं आहे का? त्यामागचे नेमकं कारण काय? असा प्रश्न शत्रुघ्न सिन्हा यांना विचारण्यात आला. त्यावर ते म्हणाले, "हो, त्यावेळी दोन स्टार्समध्ये संघर्ष असणं ही फार सामान्य गोष्ट होती." "त्यावेळी तारुण्याचा जोश असतो. प्रत्येकाचे वेगवेगळे चाहते असतात." "त्यामुळे तुम्ही आपोआप वेगवेगळ्या गटात विभागले जाते." "चाहते एखाद्याला डोक्यावर घेतात आणि एखाद्याला कमी लेखतात, त्यातूनच हा संघर्ष निर्माण होतो." "पण आता माझं कुणाशीही शत्रुत्त्व नाही." यानंतर त्यांना अमिताभ बच्चन यांच्याबरोबर असलेल्या नात्याबद्दल विचारणा करण्यात आली. त्यावर ते म्हणाले, "मी तुम्हाला सांगितल्याप्रमाणे त्यावेळी तरुणपणाचा उत्साह असायचा." "माझी आणि अमिताभची मैत्री फार जुनी आहे." "त्याकाळी आमच्या दोघांमध्ये भांडण व्हायचे." "पण आता ते नाही. त्यावेळी आम्ही प्रसिद्धीझोतात होतो." "पण काळाबरोबर आमच्या दोघांचं नातं हे चांगलं झालं. आमच्यातील मैत्रीत सुधारणा झाली." "माझ्या मनात अमिताभ यांच्याविषयी खूप आदर आहे." "अमिताभ बच्चन हे देशाचे महान अभिनेते आहेत आणि माझे मित्र आहेत, याचा मला आनंद आहे," असे शत्रुघ्न सिन्हा यांनी सांगितले.