प्राजक्ता माळीने सांगितला संघर्षमय प्रवास, म्हणाली "मुंबई- पुण्याच्या मालगाडीतून..."

मराठी सिनेसृष्टीतील लोकप्रिय अभिनेत्रींच्या यादीत प्राजक्ता माळीचे नाव कायमच आघाडीवर असते. तिने अभिनयाच्या जोरावर प्रेक्षकांच्या मनात एक वेगळे स्थान निर्माण केलं आहे. प्राजक्ताने आतापर्यंत अनेक मालिका, नाटक, चित्रपटात काम केले आहे. मात्र प्राजक्ताचा सिनेसृष्टीतील प्रवास इतका सोपा नव्हता. एका सर्वसामान्य घरातील मुलगी ते सिनेसृष्टीतील आघाडीची अभिनेत्री या संघर्षमय प्रवासाबद्दल प्राजक्ता माळीने भाष्य केले. प्राजक्ताने नुकतंच ‘झी युवा सन्मान २०२३’ या कार्यक्रमात हजेरी लावली. या कार्यक्रमात तिने सिनेसृष्टीतील संघर्षाबद्दल स्पष्टपणे उत्तर दिले. "मी ज्यावेळी संघर्ष करत होती त्यावेळी आर्थिक संघर्ष होता." "मी पुण्याची असल्याने मला स्थलांतर करावं लागणार होतं. तेव्हा मुंबईत एकही नातेवाईक नव्हता." "मुंबई नवीन होती, कुटुंबाला सोडून राहणं नवं होतं." "माझी आर्थिक परिस्थिती तितकीशी चांगली नव्हती." "माझे वडील पोलिसात होते, त्यामुळे इतकेच पैसे आहे, यातच सर्व बसवायचं हे असं वातावरण घरात होतं." "त्यावेळी लोकल ट्रेन म्हणजे अगदी मुंबई- पुण्याच्या मालगाडीतूनही मी प्रवास केला आहे." "मुंबईतील सिनेसृष्टीत किंवा सेटवर जे वातावरण आहे." "चढाओढ, राजकारण, गॉसिप्स, अंतर्गत राजकारण या सर्व गोष्टी आहेत." "अभिनेत्रींविषयी तर स्पेशली तिला आपण कसं नव्या पद्धतीने छळू शकतो असं सर्व होत असतं." "या सर्वच बाबतीत संघर्ष होता आणि आताही आहे. आता फक्त झोन बदलला आहे." "मला वाटतं संघर्ष हा कायम असणार आहे." "आता फक्त तो आर्थिक राहिलेला नाही. मानसिक किंवा भावनिकदृष्ट्या जास्त आहे." "यश मिळालं आहे ते टिकवण्यामध्येही तो आहे. हे अव्याहतपणे अगदी मरेपर्यंत चालू राहणार आहे." "ते कधीही संपणार नाही आणि मी ते स्वीकारलं आहे." "संघर्ष हा प्रत्येकाच्या आयुष्याचा घटक आहे, हे प्रत्येकाने स्वीकारायला हवं”, असे प्राजक्ता माळीने म्हटले. दरम्यान प्राजक्ता माळी ही लवकरच एका चित्रपटात झळकणार आहे. मात्र याचे नाव अद्याप जाहीर करण्यात आलेले नाही.

“अभिनेत्रींना आपण कसं नव्या पद्धतीने छळू शकतो असं सर्व होत असतं”