‘मराठी सिनेसृष्टीतील तुझी क्रश कोण?’ वैभव तत्त्ववादी म्हणाला “त्या भेटल्या की…”

मराठी सिनेसृष्टीतील लोकप्रिय अभिनेता म्हणून अभिनेता वैभव तत्त्ववादीला ओळखले जाते. मराठीबरोबरच हिंदी मनोरंजनसृष्टीतही त्याने स्वतःची ओळख निर्माण केली आहे. वैभव तत्त्ववादी हा सध्या त्याच्या 'सर्किट' या चित्रपटामुळे चर्चेत आहे. या चित्रपटाच्या निमित्ताने वैभव तत्त्ववादीने 'लोकसत्ता डिजीटल अड्डा'ला मुलाखत दिली. या मुलाखतीत त्याने चित्रपटाशिवाय, त्याचे खासगी आयुष्य, डाएट याबद्दलही भाष्य केले. यावेळी वैभवला मराठी सिनेसृष्टीतील तुझं क्रश कोण? याबद्दल विचारणा केली. त्यावेळी त्याने लाजत लाजत उत्तर दिले. "आता माझं सिनेसृष्टीत कोणीही क्रश नाही." "सर्वजण आता माझ्या चांगल्या मैत्रिणी झाल्या आहेत." "मी एका लग्नाची गोष्ट हे मराठीतील पहिलं नाटक पाहिलं होतं." "त्यात अभिनेत्री कविता लाड या ज्या पद्धतीने स्टेजवर येतात आणि प्रशांत दामले हे ती परी अस्मानीची असं गातात." "तुम्ही ९० च्या काळात जन्मलेल्या कोणालाही हा प्रश्न विचारला तर तेही सांगतील की त्यांच्यासाठी पहिला क्रश हा तोच होता." "माझ्यासाठी मराठी सिनेसृष्टीतील पहिला क्रश हा कविता ताईच आहेत." "मी त्यांना ताई म्हणतो, पण अजूनही त्या भेटल्या की त्यांना सांगतो की तुम्ही माझ्या पहिल्या क्रश आहात." "तुम्ही कायमच माझ्या पहिल्या क्रश राहाल", असे वैभव तत्त्ववादी म्हणाला.