“‘बाई, बूब्स आणि ब्रा’ पोस्टनंतर मला एका लग्न झालेल्या पुरुषाने फोन केला अन्…” हेमांगी कवीने सांगितला ‘तो’ किस्सा

मराठी अभिनेत्री आणि नृत्यांगना म्हणून हेमांगी कवी-धुमाळला ओळखले जाते. हेमांगीला तिच्या स्पष्टवक्तेपणासाठी कायमच ओळखले जाते. काही वर्षांपूर्वी हेमांगीने ‘बाई, बुब्स आणि ब्रा’ अशा आशयाची एक पोस्ट शेअर केली होती. या पोस्टनंतर हेमांगीने घडलेल्या एका प्रसंगाबद्दल भाष्य केले. नुकतंच हेमांगीने ‘प्लॅनेट मराठी’वरील ‘त्या नंतर सर्व काही बदललं’ या पॉडकास्टमध्ये या पोस्टनंतरचा एक किस्सा सांगितला. "बाई, बूब्स आणि ब्रा याबद्दल पोस्ट केल्यानंतर मी चार दिवस ट्रेंडला होते." "मला त्याचं अजिबातच कौतुक नाही. एक दिवस ट्रेंडींगला असतो, दुसऱ्या दिवशी नाही. हे सतत होत असतं." "या पोस्टनंतर माझ्याकडे बघण्याचा दृष्टीकोन बदलला. अनेक मैत्रिणींनी त्यांना होणारे त्रास माझ्याबरोबर सहन केले." "मला एका मुलाने रडतच एक व्हॉईज नोट पाठवली होती." "त्यात त्याने म्हटलेलं की, मी इतकी वर्ष माझ्या बायकोवर जाच करत होतो." "कारण मी नेहमी तिची तुलना तुमच्यासारख्या अभिनेत्रींबरोबर करायचो. यांचं किती छान दिसतं, तुझं का असं आहे, असे मी तिला कायम म्हणायचो." "तेव्हा ती मला म्हणायची की त्या हिरोईन आहेत वैगरे...! " "पण तुझा सर्व लेख वाचल्यानंतर कळलं की बापरे बायका इतक्या बंधनात असतात." "बाहेरची बंधन तर असतातच. पण स्वत:च्या घरातही ही बंधन असतात." "आई आली, बाबा आले, सासरे आले, दीर आला की म्हणून पटकन ओढणी वैगरे घ्यायची, का कशासाठी..?" "मी तेव्हापासून माझी आई, बायको आणि बहिणी या तिघींना सांगतो, तुम्हाला जसं राहायचं तस राहा." "आम्ही आमची नजर बदलली पाहिजे." "यामुळे एका माणसात बदल झाला ना, त्याचे डोळे उघडले ना, बस्स मला अजून काहीही नको." असे हेमांगी कवीने म्हटले.

“तुझा सर्व लेख वाचल्यानंतर कळलं की…” हेमांगी कवीने सांगितला ‘तो’ किस्सा