सिद्धार्थ जाधवने दाखवली डॉ.बाबासाहेब आंबेडकर यांच्या लंडनच्या घरातील वस्तूंची झलक, म्हणाला “माझा भीमराया…”

मराठी चित्रपटसृष्टीतील लोकप्रिय अभिनेत्यांपैकी एक अभिनेता म्हणून सिद्धार्थ जाधवला ओळखले जाते. आपल्या अभिनयाच्या हटके शैलीने प्रेक्षकांना वेड लावणारा अवलिया कलाकार म्हणून तो घराघरात प्रसिद्ध आहे. सिद्धार्थ जाधव हा सध्या लंडनमध्ये गेला आहे. 'कैरी' या चित्रपटाच्या शूटींगच्या निमित्ताने तो सध्या लंडनमध्ये आहे. त्यावेळी त्याने त्याच्या बकेट लिस्टमधील आणखी एक इच्छा पूर्ण केली आहे. सिद्धार्थने नुकतीच भारतरत्न डॉ. बाबासाहेब आंबेडकर यांच्या लंडन येथील निवासस्थानाला भेट दिली आहे. त्या ठिकाणचे काही खास फोटो सिद्धार्थने शेअर केले आहेत. "माझा भीमराया, भारतरत्न डॉ.बाबासाहेब आंबेडकर यांच लंडनमधील घर..." असे कॅप्शन त्याने या फोटोला दिले आहे. यावेळी त्याने डॉ.बाबासाहेब आंबेडकर यांच्या घरातील वस्तूंची झलकही दाखवली आहे. या पोस्टमधून त्याने महामानवाला वंदन केलं आहे. डॉ. बाबासाहेब आंबेडकर लंडनमध्ये शिक्षण घेत असताना ज्या घरात वास्तव्य करत होते तीच ही वास्तू आहे. सिद्धार्थची ही पोस्ट सध्या सोशल मीडियावर व्हायरल होत आहे. (सर्व फोटो- सिद्धार्थ जाधव/ इन्स्टाग्राम)