AI ची कमाल, ‘आदिपुरुष’च्या कलाकारांचे भन्नाट फोटो पाहून नेटकऱ्यांनी चित्रपटाच्या टीमला केले ट्रोल

दिग्दर्शक ओम राऊत यांचा बहुचर्चित 'आदिपुरुष' चित्रपट १६ जून २०२३ रोजी चित्रपटगृहांमध्ये प्रदर्शित झाला. रामायणावर आधारित असलेल्या 'आदिपुरुष'मधील संवाद, व्हीएफएक्स, कलाकारांचे लुक पाहून सोशल मीडियावर चित्रपटाला ट्रोल केले जात आहे. चित्रपटात रावण आणि सीतेचा लुक पाहून काही नेटकऱ्यांनी तीव्र नाराजी व्यक्त केली होती. आता आर्टिफिशियल इंटेलिजेंस अर्थात एआय( AI) च्या मदतीने साहिद नावाच्या डिजिटल क्रिएटरने 'आदिपुरुष'मधील कलाकारांचा नवा लुक बनवला आहे. 'आदिपुरुष' चित्रपटातील कलाकारांचा AI लुक जुन्या रामानंद सागर यांच्या रामायणामधील पात्रांसारखा आहे. साहिदचे कौशल्य पाहून नेटकरी त्याचे कौतुक करीत, "भाऊ आदिपुरुषसाठी काम केले पाहिजे होतेस, आमचे तिकिटाचे ५०० रुपये तरी वसूल झाले असते", अशी कमेंट केली आहे. दुसऱ्या एका युजरने, "ओम राऊतने तुझ्याकडून काहीतरी शिकले पाहिजे" अशी प्रतिक्रिया साहिदने शेअर केलेल्या AI च्या फोटोंवर दिली आहे. चित्रपटाला मोठ्या प्रमाणात विरोध होत असल्याने आता हळूहळू 'आदिपुरुष'च्या बॉक्स ऑफिस कलेक्शनमध्ये घट होत आहे. दरम्यान, चित्रपटात प्रभासने प्रभू श्रीराम यांची, क्रिती सेनॉनने माता सीतेची, सैफ अली खानने रावणाची व देवदत्त नागे याने हनुमानाची भूमिका साकारली आहे.