पाऊस, पारंपारिक लूक अन्…; अरुण कदम यांच्या लेकीचं मॅटर्निटी फोटोशूट, साधेपणाने वेधलं लक्ष

‘महाराष्ट्राची हास्यजत्रा’ या कार्यक्रमाच्या माध्यमातून प्रेक्षकांना खळखळून हसवणारा दादूस म्हणजेच अरुण कदम. अरुण कदम हे लवकरच आजोबा होणार आहेत. काही दिवसांपूर्वी त्यांच्या लेकीच्या डोहाळे जेवणाचा कार्यक्रम पार पडला. त्यानंतर आता अरुण कदम यांची लेक सुकन्या कदमच्या मॅटर्निटी फोटोशूटचे काही फोटो समोर आले आहेत. सुकन्या कदमने मॅटर्निटी फोटोशूटसाठी अगदी पारंपारिक साजश्रृंगार केला होता. तिने नऊवारी साडी, गळ्यात डोरलं, पायात कोल्हापुरी चप्पल असा लूक मॅटर्निटी शूटसाठी केला होता. तर तिचा नवरा सागर पोवाळे यानेही धोती, सदरा, त्यावर काळा कोट आणि टोपी असा लूक केल्याचे पाहायला मिळत आहे. अरुण कदम यांची लेक सुकन्याचे फोटोशूट भर पावसात पार पडले. त्यांचे हे फोटोशूट बांद्रा बँडस्टँड या ठिकाणी अगदी साधेपणाने करण्यात आले. सुकन्या कदम आणि सागर यांचा विवाहसोहळा २०२१ मध्ये पार पडला. सुकन्या ही कमर्शिअल आर्टिस्ट, ग्राफिक्स डिझायनर आहे. शिवाय ती भरतनाट्यमही शिकली आहे. सुकन्याच्या पहिल्या बाळंतपणासाठी अरुण यांच्यासह त्यांची पत्नीही उत्सुक आहे.