‘महाराष्ट्राची हास्यजत्रा’ फेम गौरव मोरेला ‘तो’ शब्द पडला होता महागात

‘महाराष्ट्राची हास्यजत्रा’ या कार्यक्रमातून घराघरात पोहोचलेला गौरव मोरे नेहमी चर्चेत असतो. गौरवची स्टाइल, त्याचं बोलणं हे प्रेक्षकांना खूप आवडत. सध्या गौरव ‘बॉईज ४’ चित्रपटामुळे चांगलाच चर्चेत आहे. या चित्रपटाच्या ट्रेलरमधील गौरव मोरेच्या शुद्ध भाषेने आणि लूकने सगळ्यांचे लक्ष वेधून घेतले आहे. ‘बॉईज ४’ या चित्रपटाचे शूटिंग लंडनमध्ये झाले आहे. या चित्रपटाच्या शूटिंगला जाताना गौरवला एक शब्द चांगलाच महागात पडला होता. याचा किस्सा अभिनेता पार्थ भालेरावने ‘मीडिया टॉक मराठी’ या एंटरटेन्मेंट चॅनेलशी बोलताना सांगितला. गौरव हा मुंबईवरून युकेसाठी जात होता. तेव्हा युकेला इमिग्रेशनच्या वेळेस त्याला विचारलं की, तुम्ही इथे का आलात? तुमचा इथे येण्याचा उद्देश काय आहे? गौरवने याचं उत्तर एका शब्दात दिलं अन् घोळचं झाला. गौरव म्हणाला, ‘शूटिंग.’ हे ऐकताना त्याला विमानतळावर अडवलं. या घटेननंतर संपूर्ण चित्रपटाच्या टीमला सांगितलं की, चित्रपटाचं शूटिंग म्हणा किंवा फिल्मोग्राफी म्हणा फक्त शूटिंग म्हणून नका. दरम्यान, गौरव मोरेसाठी ऑक्टोबर महिना खूप खास आहे. कारण एकाच महिन्यात त्याचे तीन चित्रपट प्रेक्षकांच्या भेटीस येणार आहेत. ६ ऑक्टोबरला गौरवचा ‘अंकुश’ हा चित्रपट प्रदर्शित झाला. त्यानंतर २० ऑक्टोबरला ‘बॉईज ४’ आणि २७ ऑक्टोबरला ‘लंडन मिसळ’ हे गौरवचे चित्रपट प्रेक्षकांच्या भेटीस येणार आहेत.