Photos : कुणीतरी येणार गं! थाटामाटात पार पडलं ‘बिग बॉस’ फेम सई लोकूरचं डोहाळे जेवण, मैत्रिणींनी केली खास तयारी

'बिग बॉस' फेम अभिनेत्री सई लोकूरच्या घरी लवकरच नव्या पाहुण्याचं आगमन होणार आहे. अभिनेत्रीने काही दिवसांपूर्वी सोशल मीडियावर नवऱ्यासह फोटो शेअर करत ही आनंदाची बातमी तिच्या चाहत्यांना दिली होती. सई लोकूरने बाळाचं स्वागत करण्यासाठी काही काळासाठी मनोरंजन विश्वातून ब्रेक घेतला आहे. सध्या ती सोशल मीडियाच्या माध्यमातून चाहत्यांच्या संपर्कात राहते. नुकताच सईच्या घरी तिच्या डोहाळे जेवणाचा कार्यक्रम पार पडला. सईने या कार्यक्रमासाठी जांभळ्या रंगाचा गाऊन, डोक्यावर फुलांचा सुंदर तिआरा, हातात फुलांची परडी असा सुंदर लूक केला होता. डोहाळे जेवणासाठी अभिनेत्रीच्या घरी रंगीबेरंगी फुगे आणि फुलांची सजावट करण्यात आली होती. सईच्या डोहाळे जेवणाच्या कार्यक्रमात तिच्या जवळच्या मैत्रिणी सहभागी झाल्या होत्या. त्यांनी लाडक्या सईसाठी खास तयारी केली होती. "माय फेरी टेल बेबी शॉवर" असं कॅप्शन सई लोकूरने तिच्या डोहाळे जेवणाच्या फोटोंना दिलं आहे. "मला एखाद्या राजकुमारीसारखं वाटतंय", असंही सईने कॅप्शनमध्ये म्हटलं आहे. सईच्या फोटोंवर तिच्या चाहत्यांनी शुभेच्छांचा वर्षाव केला आहे. (सर्व फोटो सौजन्य : सई लोकूर / इन्स्टाग्राम)