Dharmaveer 2 : ‘तुम्हाला खरे वाटणार नाही पण…’ मंगेश देसाई यांनी सांगितला ‘धर्मवीर २’चा प्रवास

आनंद दिघे (Anand Dighe) यांना मानणारा एक मोठा वर्ग आजही मोठ्या प्रमाणात ठाण्यात आहे. आपल्या लोककारणी नेत्याला 'धर्मवीर' (Dharmaveer) चित्रपटाच्या माध्यमातून रुपेरी पडद्यावर बघायला प्रेक्षक आतुर होते. 'धर्मवीर' या चित्रपटला प्रेक्षकांचा उदंड प्रतिसाद मिळाला, चित्रपट बघून अनेकजण भावूकही झाले आणि त्यांच्या आठवणी या पुन्हा एकदा नव्याने जाग्या झाल्या. अभिनेता प्रसाद ओकने (Prasad Oak) साकारलेली धर्मवीर आनंद दिघे साहेबांची भूमिका अतिशय उत्कृष्ट होती. या चित्रपटाने अनेक पुरस्कारही प्राप्त केले. आभाळाएवढं कर्तृत्व आणि व्यक्तिमत्त्व असलेल्या या लोकनेत्याचा जीवनप्रवास चित्रपटाच्या एका भागातून दाखविणे शक्य नव्हते. 'धर्मवीर' चित्रपटाच्या माध्यमातून धर्मवीर आनंद दिघे साहेब जगभरात पोहोचले. त्यांच्या आयुष्यातील अशा भरपूर गोष्टी आहेत ज्या जनतेसमोर येणं गरजचं आहे, त्यामुळेच आम्ही 'धर्मवीर - २' (Dharmaveer 2) करण्याचे ठरविले. 'धर्मवीर' चित्रपटाच्या वेळी माझ्या मोबाईलच्या वॉलपेपरवर धर्मवीर आनंद दिघे साहेबांचा फोटो होता. कालांतराने मी तो बदलला. काही केल्या मनात इच्छा असूनही 'धर्मवीर - २' चित्रपटाच्या गोष्टी या जुळून येत नव्हत्या. शेवटी मी दिघे साहेबांना मनापासून साद घातली आणि 'धर्मवीर २' चित्रपट करण्याबाबतची इच्छा व्यक्त केली. तुम्हाला खरे वाटणार नाही पण लगेच दुसऱ्या दिवशी सर्व गोष्टी या अचानकपणे लगेच जुळून आल्या आणि 'धर्मवीर -२' चित्रपटाच्या कामाला सुरुवात झाली. आजही दिघे साहेब हे आपल्या आजूबाजूला असल्याची प्रचिती मला यातून मिळाली असे निर्माते मंगेश देसाई (Mangesh Desai) यांनी सांगितले. ज्याप्रमाणे 'धर्मवीर' चित्रपटाला रसिक प्रेक्षकांचा उदंड प्रतिसाद मिळाला त्यापेक्षाही 'धर्मवीर - २' चित्रपटाला प्रतिसाद मिळेल याची आम्हाला आशा असल्याचे साहील मोशन आर्ट्सचे निर्माते मंगेश जीवन देसाई आणि झी स्टुडिओजचे उमेश कुमार बन्सल यांनी सांगितले. येत्या ९ ऑगस्टला 'धर्मवीर - २' हा चित्रपट मराठी आणि हिंदी भाषेतून आपल्या भेटीस येणार आहे. (सर्व फोटो सौजन्य : मंगेश देसाई/इन्स्टाग्राम) (हेही पाहा : तृप्ती डिमरीचा पाण्यात विकी कौशलबरोबर रोमँटिक अंदाज; फोटो सोशल मीडियावर व्हायरल)