तितीक्षा तावडेचं गाव पाहिलंत का? अभिनेत्रीची कोकण सफर, साजरा केला आई-बाबांच्या लग्नाचा ४० वा वाढदिवस, पाहा फोटो…

‘सातव्या मुलीची सातवी मुलगी’ या मालिकेमुळे अभिनेत्री तितीक्षा तावडे घराघरांत लोकप्रिय झाली. ‘सातव्या मुलीची सातवी मुलगी’ या मालिकेने प्रेक्षकांचा निरोप घेतला असला तरी सध्या तितीक्षा सोशल मीडियाच्या माध्यमातून आपल्या चाहत्यांच्या संपर्कात असते. अलीकडेच तितीक्षा कोकणात आपल्या माहेरी गेली होती. तितीक्षाने तिच्या आई-बाबांच्या लग्नाचा ४० वा वाढदिवस कोकणात गावी साजरा केला. यावेळी त्यांनी आडिवरे येथील प्रसिद्ध महाकाली मंदिरात जाऊन दर्शन घेतलं. गावचं घर, अंगण, नारळाच्या बागा, कोकणातील निसर्गरम्य वातावरण याची झलक अभिनेत्रीने शेअर केलेल्या फोटोंमध्ये पाहायला मिळत आहे. "लग्नाच्या ४० व्या वाढदिवसाचं सेलिब्रेशन... हा सुंदर क्षण आम्ही परफेक्ट जागेवर साजरा करतोय - कोकण" असं कॅप्शन अभिनेत्रीने या फोटोंना दिलं आहे. तितीक्षाने शेअर केलेल्या फोटोंवर नेटकऱ्यांसह मराठी कलाकारांनी कौतुकाचा वर्षाव केला आहे. दरम्यान, आता तितीक्षा नवीन कोणत्या प्रोजेक्टमधून प्रेक्षकांच्या भेटीला येणार याची चाहते आतुरतेने वाट पाहत आहेत. ( सर्व फोटो सौजन्य : तितीक्षा तावडे इन्स्टाग्राम )