‘महाराष्ट्राची हास्यजत्रा’ फेम अभिनेत्याचा पार पडला साखरपुडा! होणाऱ्या बायकोला पाहिलंत का? मालिकाविश्वाशी आहे खास कनेक्शन

‘महाराष्ट्राची हास्यजत्रा’ या कार्यक्रमामुळे अभिनेता निमिश कुलकर्णी घराघरांत लोकप्रिय झाला. निमिशने अलीकडेच त्याच्या सगळ्या चाहत्यांना आनंदाची बातमी दिली. अभिनेत्याचा साखरपुडा नुकताच पार पडला असून, आता निमिश लवकरच लग्नबंधनात अडकणार आहे. अभिनेत्याने सोशल मीडियावर साखरपुड्याचे फोटो शेअर करत त्याच्या सर्व चाहत्यांना सुखद धक्का दिला आहे. निमिश कुलकर्णीची होणारी पत्नी सुद्धा मराठी मनोरंजनसृष्टीत सक्रिय आहे. मालिकांची क्रिएटिव्ह हेड म्हणून ती काम पाहते. तिचं नाव आहे कोमल भास्कर. निमिश कुलकर्णीची होणारी पत्नी 'लाखात एक आमचा दादा' या मालिकेची क्रिएटिव्ह हेड आहे. यापूर्वी तिने 'दार उघड बये' या मालिकेची देखील क्रिएटिव्ह हेड म्हणून जबाबदारी सांभाळली होती. साखरपुड्याचे फोटो शेअर करत कोमल लिहिते, “एक नवीन सुरुवात…आता आयुष्यभर साथ...” याशिवाय कॅप्शनमध्ये तिने साखरपुड्याची तारीख देखील नमूद केली आहे. निमिश व कोमल यांचा साखरपुडा २५ जुलै २०२५ रोजी पार पडला. निमिश कुलकर्णीने साखरपुड्यात डिझायनर शेरवानी घातली होती. तर, त्याच्या भावी पत्नीने जांभळ्या रंगाची सुंदर साडी साखरपुड्यात नेसली होती. दोघेही पारंपरिक लूकमध्ये खूपच सुंदर दिसत होते. दरम्यान, निमिशच्या वर्कफ्रंटबद्दल सांगायचं झालं, त्याने हास्यजत्रेसह मालिका व चित्रपटांमध्येही काम केलेलं आहे. सई ताम्हणकरची मुख्य भूमिका असलेल्या ‘अग्नी’ या बॉलीवूड सिनेमात सुद्धा तो झळकला आहे. सध्या 'चला हवा येऊ द्या' या शोचा दिग्दर्शक म्हणून निमिश जबाबदारी सांभाळत आहे. ( सर्व फोटो सौजन्य : निमिश कुलकर्णी इन्स्टाग्राम व @ miss_canon_21 )