प्रसिद्ध मराठी अभिनेत्याची पत्नी पोहोचली केदारनाथला; ‘या’ दिवशी बंद होतील मंदिराचे दरवाजे; शेअर केले सुंदर फोटो

हिंदू भाविकांसाठी श्रद्धास्थान असलेल्या केदारनाथ धाम मंदिराचं दर्शन घेण्यासाठी आता अवघे काही दिवस बाकी राहिले आहेत. कारण, हिवाळ्यात होणाऱ्या बर्फवृष्टीमुळे दरवर्षी दिवाळीत भाऊबीजेला मंदिराचे द्वार बंद केले जातात. त्यानंतर मंदिर थेट सहा महिन्यांनी म्हणजेच एप्रिल किंवा मे महिन्याच्या आसपास उघडलं जातं. यंदा केदारनाथ मंदिराचे द्वार २३ ऑक्टोबरला बंद होणार आहेत. त्याआधी प्रसिद्ध मराठी अभिनेत्याची पत्नी केदारनाथला पोहोचली आहे. यावर्षी अमृता खानविलकर, प्राजक्ता माळी असे बरेच मराठी सेलिब्रिटी केदारनाथ मंदिरात दर्शनासाठी गेले होते. आता नुकतीच प्रसाद ओकची पत्नी मंजिरी ओक सुद्धा केदारनाथला पोहोचली आहे. मंजिरी ओक सध्या तिची १२ ज्योतिर्लिंग यात्रा पूर्ण करत आहे. काही दिवसांपूर्वीच तिने वाराणसी येथे काशी विश्वेश्वराचं दर्शन घेतलं. यावर्षी पहिल्या श्रावणी सोमवारी मंजिरीने १२ ज्योतिर्लिंग यात्रा पूर्ण करण्याचा संकल्प केला होता. त्र्यंबकेश्वर मंदिरात प्रसाद-मंजिरी जोडीने गेले होते. श्रावण महिन्यापासून मंजिरी तिची ही १२ ज्योतिर्लिंग यात्रा पूर्ण करत आहे. केदारनाथ यात्रेदरम्यानचे सुंदर फोटो तिने सोशल मीडियावर शेअर केले आहेत. यातील एका फोटोला मंजिरीने #समाधान असं कॅप्शन दिलं आहे. दरम्यान, मंजिरीने केदारनाथ यात्रेचा व्हिडीओ देखील इन्स्टाग्रामवर शेअर केला आहे. ( सर्व फोटो सौजन्य : मंजिरी ओक इन्स्टाग्राम )