सरवणकरांची सून! तेजस्विनी लोणारीच्या साखरपुड्याला पोहोचले ‘हे’ मराठी कलाकार, होणारे पती आहेत शिवसेनेचे युवा नेते, जाणून घ्या…

लोकप्रिय अभिनेत्री व निर्माती तेजस्विनी लोणारी लवकरच लग्नबंधनात अडकणार आहे. तेजस्विनी व शिवसेना युवा नेते समाधान सरवणकर यांचा साखरपुडा नुकताच मुंबईतील आलिशान हॉटेलमध्ये पार पडला. याचे फोटो अन् व्हिडीओ सध्या सोशल मीडियावर तुफान व्हायरल होत आहेत. तेजस्विनी आता राजकीय घराण्याची सून होणार आहे. शिवसेनेचे नेते व माजी आमदार सदा सरवणकर यांचे पुत्र समाधान सरवणकरांशी ती लग्नगाठ बांधणार आहे. समाधान सरवणकर हे शिवसेना पक्षाचे युवा नेते आणि माजी नगरसेवक आहेत. या दोघांच्या साखरपुड्याला अनेक मान्यवर उपस्थित होते. तेजस्विनी लोणारीच्या साखरपुड्याला मराठी कलाकारांची मांदियाळी पाहायला मिळाली. तिने प्रमुख भूमिका साकारलेल्या 'तुझेच मी गीत गात आहे' या मालिकेतील बरेच कलाकार साखरपुड्याला उपस्थित होते. पल्लवी वैद्य, अभिजीत खांडकेकर, सुखदा खांडकेकर, हार्दिक जोशी, अक्षया देवधर, पूजा सावंत, सिद्धार्थ जाधव असे बरेच कलाकार तेजस्विनीला शुभेच्छा देण्यासाठी आले होते. साखरपुड्याला तेजस्विनीने पारंपरिक लूक केला होता. लाल रंगाची डिझायनर साडी, गळ्यात सुंदर नेकलेस, हातात हिरव्या बांगड्यांचा चुडा या लूकमध्ये तेजस्विनी अतिशय सुंदर दिसत होती. आता तेजस्विनी लग्नबंधनात केव्हा अडकणार याची चाहते आतुरतेने वाट पाहत आहे. दरम्यान, संपूर्ण मराठी मनोरंजनसृष्टीतून सध्या तेजस्विनी व समाधान सरवणकर यांच्यावर शुभेच्छांचा वर्षाव करण्यात येत आहे. ( फोटो सौजन्य : तेजस्विनी लोणारी इन्स्टाग्राम स्टोरीजचे स्क्रीनशॉट )