Raksha Bandhan 2023: राशीनुसार ‘या’ रंगाची राखी तुमच्या भावासाठी ठरणार शुभ? धनसंपत्तीत होऊ शकते वाढ

दरवर्षी श्रावण महिन्याच्या पौर्णिमेला देशभरात रक्षाबंधनाचा सण साजरा केला जातो. हा सण भाऊ-बहिणीच्या प्रेमाचे ते प्रतीक आहे. रक्षाबंधन या शब्दाचा अर्थ सुद्धा या नात्याइतकाच सहज व सोपा आहे. भावंडांनी एकमेकांची कठीण काळात रक्षा करायची आठवण करून देणारे एक बंधन यादिवशी राखीच्या रूपात हातावर बांधले जाते. यंदा 30 आणि 31 ऑगस्टला संपूर्ण देशात रक्षाबंधन हा सण साजरा केला जाणार आहे. ज्योतिषशास्त्रानुसार, भावाच्या राशीनुसार विशिष्ट रंगाची राखी बांधणे भावासाठी अतिशय शुभ ठरू शकते. मेष राशीचे लोक अतिशय ऊर्जावान असतात. या लोकांसाठी लाल रंगाची राखी शुभ ठरू शकते. वृषभ राशीचे लोक अत्यंत व्यवहारी मानले जातात. वाढ आणि स्थिरतेचे प्रतीक असणाऱ्या हिरव्या रंगाची राखी या लोकांसाठी शुभ ठरू शकते. पिवळ्या रंगाची राखी मिथुन राशीच्या लोकांच्या आनंदी स्वभावाचे प्रतिनिधीत्व करते. कर्क राशीचे लोक अतिशय प्रेमळ मानले जातात. पांढऱ्या रंगाची राशी त्यांच्या प्रेमळ स्वभावाचे प्रतीक मानली जाते. सोनारी रंगाची राखी सिंह राशीच्या लोकांच्या नेतृत्व कौशल्याचे प्रतिनिधीत्व करते. कन्या राशीच्या लोकांना प्रत्येक गोष्ट नीटनेटकेपणाने करणे पसंत असते. अशा लोकांसाठी निळ्या रंगाची राखी उत्तम ठरू शकते. गुलाबी रंगाची राखी तूळ राशीच्या लोकांच्या वचनबद्धतेचे प्रतीक ठरते. वृश्चिक राशीच्या लोकांचे व्यक्तिमत्त अत्यंत उत्कट असल्याने त्यांच्यासाठी मरुन रंगाची राखी शुभ ठरू शकते. जांभळा रंग धनू राशीच्या लोकांच्या कल्पकतेचे प्रतीक आहे. मकर राशीचे लोक अतिशय शिस्तबद्ध असतात. या लोकांसाठी तपकिरी रंगाची राखी शुभ ठरू शकते. कुंभ राशीचे लोक चौकटीबाहेरचा विचार करण्यात तरबेज असतात. या लोकांसाठी चंदेरी रंगाची राखी उत्तम ठरू शकते. मीन राशीचे लोक अतिशय संवेदनशील असतात. या लोकांसाठी पिस्ता रंगाची राखी शुभ ठरू शकते. येथे देण्यात आलेली माहिती गृहीतके आणि सामान्य माहितीवर आधारित आहे. (Photos: Freepik/Pexels/Pixabay/Unsplash)