Photos: एकनाथ शिंदे आणि आमदारांसाठी गुवाहाटी हॉटेलमध्ये ७० खोल्या; एका रुमचे भाडे लाखोंच्या घरात

नगरविकास मंत्री एकनाथ शिंदे यांनी अनेक शिवसेना आमदारांसह बंड केल्याने महाविकास आघाडी सरकार संकटात आले आहे. शिवसेना बंडखोर नेते एकनाथ शिंदे यांना शिवसेनेच्या आमदारांचा पाठिंबा वाढत आहे. या पार्श्वभूमीवर पक्षप्रमुख उद्धव ठाकरे यांनी मुख्यमंत्रीपदाचा आणि पक्ष प्रमुख पदाचा राजीनामा देण्याची तयारी दर्शवली. तसेच वर्षा हा मुख्यमंत्री निवास सोडून मातोश्रीवर जाण्याचा निर्णय घेतला. एकनाथ शिंदे गटाकडून भाजपाला समर्थनाचं पत्र देण्यात येणार असल्याच्याही चर्चा आहेत. शिंदे यांच्या बंडानंतर गुरुवारी आणखी काही शिवसेना आमदार गुवाहाटीला गेले आहेत. गुवाहाटीतील रेडिसन ब्लू हॉटेलमध्ये शिंदेंसोबत ३७ शिवसेना आमदार व ९ अपक्ष आमदार आहेत. एनडीटीव्ही वृत्तवाहिनीने दिलेल्या माहिती नुसार रेडिसन ब्लू हॉटेलमध्ये ७० रुमचे बुकींग करण्यात आले आहे. सात दिवसांसाठी रुमचे बुकींग करण्यात आले आहे. सूत्रांनी दिलेल्या माहितीनुसार, या हॉटेलचे सात दिवसांचे भाडे ५६ लाख रुपये आहे. रेडिसन ब्लू हॉटेलमध्ये एका दिवसाचे जेवण आणि इतर सुविधांसाठी तब्बल ८ लाख रुपये मोजावे लागतात. राज्यातील सत्ता संघर्षावर चर्चेमधून तोडगा निघू शकतो अशी थेट ऑफर शिवसेनेचे खासदार आणि प्रवक्ते संजय राऊत यांनी बंडखोर नेते एकनाथ शिंदे यांना दिली आहे. बंडखोरी करून गुवाहाटीत गेलेल्या शिवसेना आमदारांना २४ तासात ते परत मुंबईत आल्यास महाविकासआघाडीमधून बाहेर पडू, असं वक्तव्य संजय राऊत यांनी केलं आहे. एकनाथ शिंदे यांच्या बंडाचे वर्णन मुख्यमंत्री उद्धव ठाकरे यांनी 'कुऱ्हाडीचा दांडा गोतास काळ' अशा शब्दांत केले. (सर्व फोटो सौजन्य : ट्विटर)