Photos : शिवसेनेतील बंडखोरीनंतर भाषणात रडले होते आमदार संतोष बांगर; मुख्यमंत्री शिंदे गटात सामील झाल्याने आश्चर्याचा धक्का

राज्यातील विधीमंडळ अधिवेशनाचा आज दुसरा दिवस आहे. शिंदे-फडणवीस सरकारला विश्वासदर्शक ठरावाला सामोरे जावे लागणार आहे. शिवसेनेचे ३९ आमदार मुख्यमंत्री एकनाथ शिंदेंच्या गटात असल्याचा दावा त्यांनी केला होता. आता शिवसेनेचा आणखी एक आमदार शिंदे गटात गेल्याने सर्वांनाच आश्चर्याचा धक्का बसला आहे. (फोटो : ANI) शिवसेनेचे हिंगोलीचे आमदार संतोष बांगर हे शिंदे गटात सामील झाल्याची माहिती समोर आली आहे. संतोष बांगर हे कालपर्यंत शिवसेनेसोबत एकनिष्ठ होते. विशेष म्हणजे त्यांनी विधानसभा अध्यक्षपदाच्या निवडणुकीत शिवसेना उमेदवार राजन साळवी यांच्या बाजूने मतदान केले होते आज संतोष बांगर यांनी मुख्यमंत्री शिंदे आणि समर्थक आमदारांसोबत विधानभवनात प्रवेश केल्याने सगळेच आश्चर्यचकीत झाले. (फोटो : गणेश शिर्सेकर, इंडियन एक्सप्रेस) शिवसेनेतील बंडखोरीनंतर हिंगोलीत काढण्यात आलेल्या मोर्च्यात संतोष बांगर सहभागी झाले होते. बंडखोरा आमदारांविरोधात भूमिका घेतल्यामुळे बांगर यांचे कौतुकही झाले होते. याशिवाय त्यांची मिरवणूकही काढण्यात आली होती. या मिरवणूकीतील त्यांच्या भाषणाची तुफान चर्चा रंगली होती. यावेळी संतोष बांगर रडले होते. “तुम्ही पुन्हा पक्षात या. पक्षप्रमुख उद्धव ठाकरे तुम्हाला माफ करतील “,असे आवाहन त्यांनी शिंदे समर्थक आमदारांना केले होते. “निवडणुकीत विजयी झाल्यानंतर माझी एवढी मोठी मिरवणूक काढली नव्हती, ती आज काढण्यात आली. शिवसैनिक उद्धव ठाकरेंच्या पाठिशी कायम असणार “, असं ते म्हणाले होते. संतोष बांगर मुख्यमंत्री एकनाथ शिंदेंच्या गटात सामील झाल्यानंतर त्यांच्या या भाषणाचा व्हिडीओ पुन्हा व्हायरल होत आहे. बांगर हे शिंदे गटात गेल्याने शिंदे गटातील आमदारांची संख्या ४० वर पोहोचली आहे. तर उद्धव ठाकरे गटातील आमदारांची संख्या १५ वर आली आहे. (सर्व फोटो : संतोष बांगर/ इन्स्टाग्राम) (हेही पाहा : महाराष्ट्राच्या मुख्यमंत्र्यांना नेमका किती पगार मिळतो?; कुठल्या सुविधांसाठी ते पात्र असतात?)