Photos: आपल्या मतदारसंघात आदित्य ठाकरेंच्या सभेला झालेली गर्दी पाहून शिंदे गटाचे प्रवक्ते केसरकर म्हणतात, “मी शिवसेनेत प्रवेश…”

सावंतवाडीमध्ये येऊन माझ्या विरोधात यापूर्वी ज्यांनी ज्यांनी भाषणे केली ते पराभूत झाले, ही वस्तुस्थिती आहे, असं शिंदे गटाचे प्रवक्ते आमदार दीपक केसरकर यांनी म्हटलंय. याच कारणामुळे माझ्या विरोधात सभेत बोलणाऱ्या विरोधात मी सावंतवाडीत येऊन उत्तर देणार आहे, असंही केसरकर यांनी म्हटलं आहे. आदित्य ठाकरेंच्या सावंतवाडीमधील सभेनंतर केसरकरांनी हे विधान केलं आहे. युवासेना प्रमुख आदित्य ठाकरे सोमवारी निष्ठा दौऱ्यानिमित्त सिंधुदुर्ग जिल्ह्यात दाखल झाले. आदित्य यांनी सावंतवाडी मतदारसंघाचे बंडखोर आमदार दीपक केसरकर यांच्या मतदारसंघात शिवसेना समर्थकांसोबत ढोल ताशांच्या गजरात मिरवणूक काढत जोरदार शक्तिप्रदर्शन केले. यावेळी शिवसैनिकांकडून जोरदार घोषणाबाजी करण्यात आली. यावेळी चिटणीस नाका ते गांधीचौक अशी भव्य मिरवणूक काढण्यात आली. आदित्य ठाकरेंनी सावंतवाडीतील सभेचे काही फोटो आपल्या ट्विटर हॅण्डलवरुन शेअऱ केले आहेत. मुख्यमंत्री एकनाथ शिंदे यांनी बंडखोरी केल्याने शिवसेनेत मोठं खिंडार पडलं आहे. याच पार्श्वभूमीवर आदित्य यांच्या या दौऱ्याचं आयोजन करण्यात आलंय. एकनाथ शिंदे यांना पक्षातील ४० पेक्षा जास्त आमदारांचा पाठिंबा मिळाला आहे. त्यामुळे शिंदे गटाची बाजू भक्कम आहे. दुसरीकडे मुख्य शिवसेनेत मोठं खिंडार पडलं आहे. शिवसेनेत झालेली ही मोठी फूट भरून काढण्यासाठी शिवसेना युवासेना प्रमुख आदित्य ठाकरे चांगलेच कामाला लागले आहेत. शिवसेना पक्षाची हानी करणारे एक राऊत जेलमध्ये गेले, आता दुसरे राऊत मैदानात उतरले आहेत, ते आहे ती शिवसेना संपविणार आहेत. त्यांना योग्य उत्तर दिले जाईल असे आमदार केसरकर म्हणाले. तसेच आदित्य यांच्या सभेसंदर्भात बोलताना सावंतवाडीमध्ये येऊन सभेला उत्तर दिले जाईल असेही केसरकर यांनी सांगितले. जनतेने माझ्यावर भरभरून प्रेम केले आहे. त्यामुळे आजच्या सभेत ५००-१००० लोक उपस्थित होते, असं केसरकर म्हणाले. मी शिवसेनेत प्रवेश केला तेव्हा २५ हजार लोक होते असा टोला केसरकर यांनी हाणला. मुख्यमंत्री एकनाथ शिंदे हे महत्त्वाची भूमिका बजावत आहे. त्यासाठी मुंबईमध्ये राहात आहे, असंही केसरकर म्हणाले. केंद्र व राज्य स्तरावर मुख्यमंत्री एकनाथ शिंदे यांची महत्त्वाची भूमिका मांडली जात आहे असे केसरकर यांनी सांगितले.