Photos : जोरदार पावसात चिंब भिजले अन् शिंदे गटावर बरसले; आदित्य ठाकरेंचे अलिबागमधील ‘ते’ फोटो चर्चेत

बंडखोरी झाल्यानंतर शिवसेनेला बळकट करण्यासाठी युवासेनेचे नेते आदित्य ठाकरे ठिकठिकाणी जाऊन शिवसंवाद यात्रेच्या माध्यमातून शिवसैनिकांना संबोधित करत आहेत. बुधवारी विधानसभेच्या पावसाळी अधिवेशनाचे पहिल्या दिवसाचे कामकाज आटोपल्यानंतर आदित्य ठाकरेंनी रायगडमधील अलिबाग येथे जाऊन शिवसैनिकांशी संवाद साधला. मुसळधार पाऊस कोसळत असतानाही त्यांच्या शिवसंवाद यात्रेला हजारो शिवसैनिकांनी उपस्थिती दर्शविली. आदित्य ठाकरेंच्या अलिबागमधील शिवसंवाद यात्रेचे फोटो सोशल मीडियावर चर्चेत आहेत. अलिबागमध्ये केलेल्या भाषणात त्यांनी राज्यातील शिंदे सरकारवर निशाणा साधला. “राज्यात सुरू असलेलं घाणेरडं राजकारण तुम्हाला चालणार आहे का? या गद्दारांना तुम्ही आपले नेते मानणार आहात का?”, असा प्रश्न त्यांनी उपस्थित शिवसैनिकांना विचारला. “राज्याचे तात्पुरतं मुख्यमंत्री यांना शपथ घेतल्यानंतर मंत्रीमंडळाचा विस्तार करण्यासाठी ४१ दिवस लागले. त्यानंतर पाच दिवसांनी खातेवाटप जाहीर केले”, असं म्हणत आदित्य ठाकरेंनी एकनाथ शिंदेवर टीका केली. रायगडमधील शिवसेनेचे शिंदे गटात सामील झालेले आमदार भरत गोगावले यांनाही त्यांनी टोला लगावला. “नवीन मंत्रिमंडळात आणि या गद्दारांच्या सरकारमध्ये रायगडला काय मिळालं?”, असा प्रश्न उपस्थित करत आदित्य ठाकरेंनी गोगावलेंवर टीका केली. पुढे ते म्हणाले, “महाविकास आघाडी सरकारच्या काळात रायगड किल्ल्यासाठी ६०० कोटींचा निधीमधले २०कोटी दिले. तसेच जिल्ह्यातील पर्यटन विकासासाठी निधी दिला”. “रायगड जिल्ह्याच्या विकासासाठी महाविकास आघाडी सरकारच्या काळात अनेक निर्णय घेतले गेले. पण, राज्यातील तात्पुरत्या सरकारने या जिल्ह्यासाठी कोणते निर्णय घेतले?”, असा प्रश्नही त्यांनी भाषणातून उपस्थित केला. सध्या आदित्य यांच्या शिवसंवाद यात्रेच्या तिसऱ्या टप्प्यातील शेवटचा दौरा सुरु आहे. या यात्रेचा चौथा टप्पा २० ऑगस्टपासून सुरु होणार असून यादरम्यान ते जळगाव इथल्या पाचोरा, धरणगाव, पारोळा, धुळे आणि मालेगाव येथील कार्यकर्त्यांशी साधणार आहेत . (सर्व फोटो : आदेश बांदेकर, आदित्य ठाकरे/ सोशल मीडिया) (हेही पाहा : दहीहंडीच्या दिवशीच शिवसेना विरुद्ध भाजपा संघर्षाची नवी ठिणगी पडणार? आदित्य ठाकरेंच्या मतदारसंघात…)