Photos: दहीहंडीच्या दिवशी मुख्यमंत्री शिंदेंच्या बालेकिल्ल्यात आदित्य ठाकरे; थेट आनंद आश्रमात पोहोचले अन्…

करोना महासाथीमुळे दोन वर्षांनंतर दहीहंडी उत्सव साजरा करण्यात आला. त्यामुळे त्याचा उत्साह ओसंडून वाहत होता. महाराष्ट्रातील विविध ठिकाणी दहीहंडी फोडण्यासाठी पथकांनी गर्दी केली होती. ठाणे शहरातील जांभळी नाका येथे खासदार राजन विचारे यांच्या दहीहंडी उत्सवाला शिवसेना नेते आदित्य ठाकरे यांनी शुक्रवारी रात्री उपस्थिती लावली. या उत्सवाच्या व्यासपीठावर येण्यापूर्वी त्यांनी टेंभीनाका येथील आनंद आश्रमात जाऊन आनंद दिघे यांच्या प्रतिमेचे दर्शन घेतल्याने अनेकांच्या भुवया उंचावल्या आहेत. शिवसेनेतील बंडखोरीनंतर मुख्यमंत्री एकनाथ शिंदे हे सातत्याने बाळासाहेब ठाकरे आणि आनंद दिघे यांचे विचार पुढे नेत असल्याचे सांगत आहेत. त्यांच्या समर्थकांकडूनही आनंद दिघे यांच्या नावाचा उल्लेख होत आहे. तसेच शिवसेनेतील बंडखोरीनंतर ठाणे जिल्ह्यातून शिंदे यांना मोठे समर्थन मिळाले आहे. या बंडखोरीनंतर आदित्य हे पहिल्यांदाच ठाणे शहरात दहीहंडी उत्सवाच्यनिमित्ताने आले होते. आदित्य ठाकरे यांनी खासदार राजन विचारे यांच्या जांभळी नाका येथील दहीहंडीला हजेरी लावली. या उत्सवाच्या व्यासपीठावर येण्यापूर्वी त्यांनी टेंभीनाका येथील आनंद आश्रमात जाऊन आनंद दिघे यांच्या प्रतिमेचे दर्शन घेतले असून त्याचे वेगवेगळे राजकीय अर्थ काढले जात आहेत. (सर्व फोटो सौजन्य : राजन विचारे, आदित्य ठाकरे / ट्विटर) (हेही पाहा : तब्बल दोन वर्षांनंतर गोविंदा आला रे… महिला आणि बाळगोपाळांमध्ये दहीहंडीचा उत्साह)