‘सर्व मंगल मांगल्ये शिवे सर्वार्थ साधिके’; वणीच्या सप्तशृंगी देवीच्या शारदीय नवरात्रोत्सवाला सुरुवात, पाहा PHOTOS

आजपासून शारदीय नवरात्रोत्सवाला प्रारंभ झाला. घरोघरी घटाची स्थापना करुन नवरात्र उत्सवाची सुरुवात करण्यात आली. दोन वर्षानंतर साजरा निर्बंधमुक्त नवरात्रोत्सव साजरा करण्यात येत असल्यामुळे भाविकांमध्ये उत्साहाचं वातावरण आहे. नाशिकच्या सप्तश्रृंग गडावर नवरात्रोत्सवास उत्साहात प्रारंभ झाला. महाराष्ट्रातील साडेतीन शक्तीपीठापैकी एक सप्तश्रृंग गडावर श्री सप्तशृंग निवासिनी देवीचा वास आहे. मंदिराचे अध्यक्ष वर्धन पी. देसाई यांच्या हस्ते घटस्थापनेची महापूजा करण्यात आली. घटस्थापनेची मुख्य महापूजा प्रमुख जिल्हा न्यायाधीश श्रीचंद दौलतराम जगमलानी यांच्या हस्ते सपत्नीक करण्यात आली. ढोल ताशाच्या गजरात मिरवणूक काढण्यात आली. पहाटे सप्तशृंगी देवीच्या आभूषणांची विधिवत पूजा व मिरवणूक काढून देवीच्या नवरात्रोत्सवाला प्रारंभ झाला देवीची पालखीचीही मिरवणूक काढण्यात आली. राज्याचे मत्स्य व बंदरे विकासमंत्री दादा भुसे यांनी पालखीला हात लावत उत्सवात सहभाग घेतला. नवरात्रोस्तवास पहिल्याच दिवशी सप्तश्रृंग गडावर भाविकांनी मोठ्या प्रमाणात गर्दी केली होती. दुपारपर्यंत जवळपास ६० हजार भाविकांनी देवीचे दर्शन घेतले. तर १० हजार भाविकांनी प्रसाद घेतला असल्याचे मंदिर प्रशासनाकडून सांगण्यात आलं आहे. यात्रा उत्सव दरम्यान दोन वेळचे मोफत अन्नदान (महाप्रसाद) सुविधा सुरु असून येणाऱ्या भाविक भक्तांच्या सेवा-सुविधेसाठी २४ तास मंदिर दर्शनासाठी खुले करण्यात आले आहे. सप्तशृंगगड परिसरात भाविकांची कुठल्याही पद्धतीने गैरसोय होऊ नये, त्या दृष्टीने कक्षाची स्थापना करण्यात आली आहे. मंदिर परिसरात २५६ सीसीटीव्ही कॅमेरे कार्यरत आहेत. तसेच एकूण १७० सुरक्षारक्षक, आपत्ती व्यवस्थापन प्रक्रियेतील स्वयंसेवक कार्यरथ आहेत.