दापोलीनंतर आता पुणे! शिंदे-ठाकरे गटाचे कार्यकर्ते आमनेसामने, एकमेकांविरोधात जोरदार घोषणाबाजी!

पुणे : एका खासगी वृत्तवाहिनीने आयोजित केलेल्या कार्यक्रमाच्या निमित्ताने पुण्यात शिंदे-ठाकरे गट शनिवारी आमनेसामने आले. दोन्ही गटाच्या कार्यकर्त्यांकडून जोरदार घोषणाबाजी करण्यात आली. मात्र, घटनेचे गांभीर्य लक्षात घेऊन पोलिसांनी दोन्ही गटांच्या कार्यकर्त्यांची समजूत घालून परिस्थिती आटोक्यात आणली. मात्र, नवी पेठेतील गांजवे चौक परिसरात काहीकाळ तणाव निर्माण झाला होता. केंद्रीय निवडणूक आयोगाने शिवसेना हे पक्षनाव आणि धनुष्यबाण हे निवडणूक चिन्ह मुख्यमंत्री एकनाथ शिंदे यांच्या ताब्यात दिले आहे. या पार्श्वभूमीवर शिवसेनेचे माजी पक्षप्रमुख उद्धव ठाकरे आणि शिंदे गट यांचे कार्यकर्ते आमनेसामने येत आहेत. पुण्यात एका खासगी वृत्तवाहिनीच्या कार्यक्रमावेळी दोन्ही गटाचे कार्यकर्ते शनिवारी एकत्र आले होते. उद्धव ठाकरे यांच्या कार्यकर्त्यांनी मुख्यमंत्री एकनाथ शिंदे यांच्याविरोधात जोरदार घोषणाबाजी केली. मुख्यमंत्री शिंदे यांच्याविरोधात घोषणाबाजी केल्यामुळे शिवसेना कार्यकर्त्यांनीदेखील उद्धव ठाकरे यांच्याविरोधात घोषणाबाजीला सुरुवात केली. त्यामुळे नवी पेठेतील गांजवे चौक परिसरात काहीकाळ तणाव निर्माण झाला होता. दोन्ही बाजूच्या कार्यकर्त्यांमध्ये बाचाबाची देखील झाली. दरम्यान, यावेळी शिवसेना उद्धव बाळासाहेब ठाकरे पक्षाचे शहराध्यक्ष संजय मोरे, बाळासाहेबांच्या शिवसेनेचे शहर प्रमुख नाना भानगिरे यावेळी उपस्थित होते. पोलिसांनी या ठिकाणी धाव घेत परिस्थिती आटोक्यात आणली.