शरद पवार की अजित पवार? नाना पाटेकर की नरेंद्र मोदी? MI की CSK? ट्विटर युजर्सच्या भन्नाट प्रश्नांवर रोहित पवारांची अफलातून उत्तरं!

राष्ट्रवादी काँग्रेसचे आमदार रोहित पवार आणि ट्विटर युजर्समध्ये रविवारी चांगलाच सवाल जवाब रंगल्याचं पाहायला मिळालं. #AskRohitPawar या हॅशटॅगखाली रोहित पवार यांना ट्विटर युजर्स प्रश्न विचारत होते. रविवारी संध्याकाळी रोहित पवार यांच्या ट्विटर अकाऊंटवरून नेटिझन्सला प्रश्न विचारण्याचं आवाहन करण्यात आलं. त्यावर ट्विटर युजर्सनं एकाहून एक भन्नाट प्रश्न विचारले. प्रश्न - तुम्ही पक्षात एखाद्या महत्त्वाच्या पदावर काम करून पक्षबांधणी का करत नाही? रोहित पवार - लवकरच. त्यावेळी आपण युवा म्हणून लवकरच एकत्रित काहीतरी करू. प्रश्न - दौरे, फिरस्तीमुळे कुटुंबाकडे दुर्लक्ष होतं. त्यामुळे कधी राजकारण नको रे बाबा असं वाटतं का? रोहित पवार - माझी मुलं जेव्हा विचारतात की तुम्ही आईच्या सोशल मीडियावर इतर लहान मुलांशी खेळताना दिसता. आम्हाला कधी वेळ देणार? तेव्हा वाटतं की आपण त्यांना वेळ द्यायला हवा. प्रश्न - रोहित पवारांना भाजपामधला कोणता नेता सर्वात जास्त आवडतो? रोहित पवार - नितीन गडकरी साहेब प्रश्न - अदाणी की राहुल गांधी? रोहित पवार - भारताचे नागरिक प्रश्न - रोहित पवारांना राजकारणाव्यतिरिक्त कुठल्या क्षेत्रात करीअर करायला आवडलं असतं? रोहित पवार - व्यावसायिक क्षेत्रात मी आहेच. प्रश्न - येत्या काळात राष्ट्रवादीत घराणेशाहीला फाटा देऊन नव्या तरुणांना, कार्यकर्त्यांच्या कर्तृत्वाला संधी मिळेल का? रोहित पवार - मीसुद्धा घराणेशाहीच्या विरोधात आहे. पक्षाच्या संघटनेला ताकद दिली पाहिजे. कार्यकर्ता नेता होणार असेल, तर त्याला ताकद दिली पाहिजे. हा सकारात्मक बदल आहे, पण त्याला वेळ लागेल. प्रश्न - मुंबई इंडियन्स की चेन्नई सुपर किंग्ज? रोहित पवार - टीम म्हणून मुंबई इंडियन्स आणि कर्णधार व खेळाडू म्हणून महेंद्रसिंह धोनी प्रश्न - महाराष्ट्र क्रिकेट असोसिएशनच्या अध्यक्षपदी बसल्यानंतर शरद पवारांकडून कोणता सल्ला मिळाला? रोहित पवार - क्रिकेटमध्ये राजकारण आणू नको. व्याप्ती एवडी वाढव की जास्तीत जास्त खेळाडूंना संधी देता येईल. निवडक हिरे पुढे आणता येतील. जे केवळ महाराष्ट्राचं नाही, तर देशाचं नेतृत्व करतील. प्रश्न - शरद पवारांनंतर कोणता राजकीय नेता तुम्हाला आवडतो? रोहित पवार - पंडित जवाहरलाल नेहरूजी प्रश्न - शरद पवार साहेब, अजित दादा की सुप्रिया ताई? रोहित पवार - शरद पवार साहेब.. कारण आमच्या कुटुंबाचा ते आधार आहेत. प्रश्न - तुमच्याकडे नेटफ्लिक्स आहे का? असेल तर आवडती वेबसिरीज कोणती? रोहित पवार - हाऊस ऑफ कार्ड्स... कधीकधी डोकं शांत करायला या ओटीटी प्लॅटफॉर्मची मदत घ्यावी लागते. प्रश्न - मटण की चिकन? रोहित पवार - राशीन (कर्जतचं) मटण.. वजन वाढल्यापासून चिकनवर शिफ्ट झालोय. प्रश्न - अजय अतुलचं कोणतं गाणं आवडतं? रोहित पवार - देवा श्री गणेशा प्रश्न - माझं एका मुलावर प्रेम आहे. पण आई-वडील लग्नाला तयार नाहीत. आम्ही पळून जायचं ठरवलंय. काय करू? रोहित पवार - पळून जाण्यासाठी आई-वडिलांनी सहमती दिली असेल, तर ते म्हणतात तसं नक्की करा! प्रश्न - राज्यातली साखर कारखानदारी, शेतकऱ्यांची थकित बिलं, ऊसतोड महिलांच्या आरोग्याच्या समस्या याकडे तुम्ही कसं बघता? रोहित पवार - पहिल्या मुद्याकडे कारखानदार आणि शासनानं लक्ष द्यावं.दुसरा मुद्दा अतिशय महत्वाचा आहे. सरकारने अशा अडचणी असल्याचं मान्य करून मतदानाचा विचार न करता अशा विषयांवर काम केलंच पाहिजे. प्रश्न - शरद पवार, अजित पवारांबरोबर काम करताना दडपण येतं का? रोहित पवार - सामान्य लोक साहेबांच्या धोरणांबाबत अंदाज बांधू शकतात. मात्र राजकीय लोकांनी साहेबांच्या डोक्यामध्ये काय सुरू आहे हे जाणून घेण्याचा प्रयत्नही करू नये. दडपण येतं! साहेबांसारखी लीगसी असेल तर नक्कीच येतं. प्रश्न - तुम्ही लग्न कधी करणार आहात? रोहित पवार - चुकून असा प्रश्न मला विचारून माझ्या अडचणीत का वाढ करता? पंधरा वर्षांपूर्वी विचारलं असतं, तर उत्तर देऊ शकलो असतो. प्रश्न - कुकुटपालन धंदा बरा आहे का? टाकावा म्हणतोय! रोहित पवार - मग टाका की! प्रश्न - कर्जत-जामखेड की हडपसर? रोहित पवार - कर्जत-जामखेडनं लढायला शिकवलंय. मी जो आहे, तो त्यांच्यामुळेच आहे. तेच माझं कुटुंब आहे. त्यामुळे कधीही कर्जत-जामखेडच. प्रश्न - उत्कृष्ट कलाकार.. नाना पाटेकर की नरेंद्र मोदी? रोहित पवार - या दोन ऑप्शनवरून तुम्हाला राजकारणाबद्दल आणि अभिनयाबद्दल बरंच कळतं असं दिसतंय. उत्तर तुम्हालाही माहिती आहे आणि लोकांनाही कळलंय. प्रश्न - महाविकास आघाडीच्या भविष्याबाबत वैयक्तिक तुम्हाला काय वाटतं? रोहित पवार - जर नेत्यांनी ठरवलं, तर भविष्य नक्कीच चांगलं आहे. प्रश्न - राजकारणापलीकडे जाऊन तुमचा विरोधी पक्षातला मित्र कोण? रोहित पवार - योगेश कदम. भाजपाचेही सांगितले असते. पण त्यांना बरीच बंधनं असल्याने त्यांचा विचार करून नाव सांगत नाहीये! प्रश्न - तामिळनाडू प्रीमियर लीगसारखी महाराष्ट्र प्रीमियर लीग सुरू व्हायला हवी का? रोहित पवार - लवकरच... प्रश्न - विलासराव देशमुखांविषयी दोन शब्द... रोहित पवार - निष्ठा आणि कर्तृत्व प्रश्न - कोणत्या मंत्रालयात तु्म्ही सर्वात चांगलं काम करू शकता? रोहित पवार - पद महत्त्वाचं नसलं, तरी जिथे युवकांच्या हाताला काम देता येईल, असं मंत्रिपद नक्कीच आवडेल! प्रश्न - आजोबा शरद पवारांकडून कोणत्या गोष्टी शिकलात? रोहित पवार - गरम वातावरणात डोकं शांत कसं ठेवायचं. प्रश्न - देश की पक्ष? रोहित पवार - देश प्रश्न - महाराष्ट्रात अशा कोणत्या गोष्टीत बदल करावासा वाटतो? रोहित पवार - शिक्षण, आरोग्य आणि बेरोजगारी प्रश्न - तुमचा बायोपिक आला, तर तुमचा रोल कुणी करावा असं वाटतं? वैभव तत्ववादी की ललित प्रभाकर? रोहित पवार - माझा रोल मलाच करायला आवडेल