…अन् काही क्षणांत समोर मातीचा ढीग झाला; ईर्शाळवाडीवर दरड कोसळली, गावाची ह्रदय पिळवटून टाकणारी दृश्यं!

माळीण किंवा तळीये दुर्घटनेच्या आठवणी एका क्षणात ताज्या करणारी दुर्घटना बुधवारी रात्रीच्या सुमारास घडली आहे. रायगड जिल्ह्यात ईर्शाळगडावरच्या इर्शाळवाडीवर दरड कोसळल्यामुळे गावातल्या अनेक घरांवर अक्षरश: मातीचा ढीग झाला ईर्शाळवाडीतल्या ठाकुरवाडी या गावावर दरड कोसळल्याची माहिती प्रत्यक्षदर्शींनी दिली आहे. या गावात ३० ते ४० कुटुंब असल्याचं सांगितलं जात आहे. मध्यरात्रीच्या सुमारास आख्खा गाव पावसामुळे आपापल्या घरांत होता. घराघरांत निजानीज झालेली असतानाच ईर्शाळगडावरून भूस्खलन झालं आणि क्षणार्धात होत्याचं नव्हतं झालं! ईर्शाळवाडी गाव ईर्शाळगडाच्या पायथ्यापासून काही उंचीवर आहे. मात्र, तिथपर्यंत जाण्यासाठी पक्का रस्ता तयार झालेला नाही. पक्का रस्त्ता नसल्यामुळे एनडीआरएफच्या सुरक्षा पथकांना जेसीबी, पोकलेनसारख्या मोठ्या यंत्रणा गावापर्यंत नेण्यात मोठ्या अडचणी आल्या. त्यामुळे इतर हत्यारांच्या साहाय्यानेच मातीचा ढिगारा उपसण्याचं काम हाती घेतलं गेलं. एनडीआरएफला या दुर्घटनेची माहिती मिळताच दोन पथकं घटनास्थळी तातडीने रवाना झाली. त्यापाठोपाठ मंत्री उदय सामंत, दादा भुसे घटनास्थळी पोहोचले. या घटनेची माहिती मिळाल्यानंतर मुंबईत अधिवेशनाच्या कामात असणारे मुख्यमंत्री एकनाथ शिंदे रायगडाच्या दिशेने रवाना झाले. सकाळी ७ च्या सुमारास ते ईर्शाळवाडी गावात पोहोचले. ईर्शाळवाडीत साधारणपणे २१० घरं असून यातील ठाकुरवाडीतील घरं पूर्णपणे मातीच्या ढिगाऱ्याखाली गेल्याचं पाहायला मिळत आहे. त्यामुळे नातेवाईकांवर दु:खाचा डोंगर कोसळला आहे. या ढिगाऱ्याखाली नेमके किती जण अडकले असावेत, याविषयी कोणतीही खात्रीशीर माहिती मिळत नसल्यामुळे नातेवाईकांच्या दु:खाला पारावार उरला नाही. दरडीखाली आलेल्या घरांच्या मलब्यातून लोकांना वाचवण्याचे प्रयत्न बचाव पथकांकडून केले जात आहेत. दरड कोसळल्यानंतर ठाकूरवाडी गावात भीषण परिस्थिती निर्माण झाली आहे. अचानक दरड कोसळल्यामुळे अनेक घरं काही क्षणात भुईसपाट झाल्याचं पाहायला मिळत आहे. या सर्व घडामोडींवर राज्याचे उपमुख्यमंत्री अजित पवार नियंत्रण कक्षातून लक्ष ठेवून आहेत. मुख्यमंत्री एकनाथ शिंदे स्वत: सकाळी ७ च्या सुमारास घटनास्थळी दाखल झाले आहेत. घटनास्थळी दाखल झाल्यानंतर मुख्यमंत्री एकनाथ शिंदे यांनी स्थानिक नागरिक व अधिकाऱ्यांकडून नेमकं काय घडलं याची माहिती घेतली.