Photos: ‘रेड सॉइल स्टोरीज’ फेम शिरीष गवसचं दुःखद निधन; त्यांच्याबद्दलच्या ‘या’ गोष्टी माहिती आहेत का?

'रेड सॉईल स्टोरीज' (Red Soil Stories) या युट्यूबवरील चॅनेलचे संस्थापक शिरीष गवसचे (Shirish Gavas) वयाच्या ३३ व्या वर्षी दुःखद निधन झाले. सिंधुदुर्गातील दोडामार्ग येथील सासोली येथे राहणारा शिरीष गवस काही दिवसांपासून मेंदूंशी निगडित आजाराने त्रस्त होता. त्याच्यावर गोव्यातील एका रुग्णालयात उपचार सुरू होते. मात्र अखेर त्याचा दुःखद मृत्यू झाल्याची बातमी समोर आली. मुंबईतील नोकरी सोडून कोकणात वसलेल्या या जोडप्याने गावाकडील खाद्यसंस्कृती, सण व उत्सव जगासमोर आणले आहेत. ४० भाषांमधील प्रेक्षकांचे प्रेम कमावताना प्रत्येक व्हिडिओमागे किती विचार करावा लागतो याविषयी त्यांनी माहिती दिली होती. शिरीष व पत्नी पूजा गवस (Pooja Gavas) यांच्या चॅनेलचे ४ लाख २७ हजार सबस्क्राइबर्स आहेत. गवस जोडप्याने आतापर्यंत या चॅनेलवर १६१ व्हिडीओ तयार करून अपलोड केलेले आहेत. शिरीष गवसचे वडील हे सेवानिवृत्त नायब तहसीलदार होते. एमबीएचे शिक्षण घेतलेला शिरीष गवस मुंबईत नामांकित कंपनीत कामाला होता. तर पत्नी पूजा गवस चित्रपट निर्मिती क्षेत्रात कार्यरत होती. करोना नंतर ते गावी स्थायिक झाले आणि त्यांनी रेड सॉईल स्टोरीजसारखा अनोखा प्रयोग केला. काही दिवसांपूर्वीच गवस दाम्पत्याने आपल्या मुलीचा पहिला वाढदिवस साजरा केला होता. 'रेड सॉईल स्टोरीज'च्या व्हिडीओंवर चाहते कमेंट करून दुःख व्यक्त करत श्रद्धांजली वाहत आहेत.