Photos: उच्च न्यायालयाची प्रशस्त इमारत नेमकी कशी असेल? ३० एकर जागा आणि ७५ कोर्टरुम

Bombay High Court Complex At Bandra East: वांद्रे पूर्व येथील शासकीय वसाहतीतील ३० एकर जागेवर मुंबई उच्च न्यायालयाची प्रशस्त अशी इमारत उभारण्यात येणार आहे. मुंबई उच्च न्यायालयाच्या नवीन इमारतीसाठी कंत्राटदार हफिज कॉन्ट्रॅक्टर यांनी ३७५० कोटी रुपये खर्चाचा आराखडा तयार करून उच्च न्यायालयाच्या सुकाणू समितीकडे सादर केला होता. या आराखड्यावर सुकाणू समितीने शिक्कामोर्तब केले आहे. आता लवकरच सार्वजनिक बांधकाम विभागाच्या माध्यमातून न्यायालयाच्या नव्या इमारतीच्या बांधकामाला सुरुवात करण्यात येणार आहे. उच्च न्यायालयाच्या या नवीन इमारतीची रचना अत्यंत आकर्षक, जुन्या-नव्या शैलीचा मिलाफ अशी असणार आहे. या इमारतीत एकूण ७५ कोर्टरुम असणार आहेत. आता लवकरच या प्रकल्पाच्या प्रत्यक्ष कामाला सुरुवात होण्याची शक्यता आहे. प्रकल्पाच्या आराखड्यानुसार २४ एकर जागेवर न्यायालयाची मुख्य इमारत उभी राहणार आहे. समोर ४ मजली, तर मागच्या बाजूस ९ मजली अशी इमारत असणार आहे. तर ४ एकर जागेवर निवासस्थाने बांधण्यात येणार आहेत. एकूण ६० लाख चौरस फूट बांधकाम क्षेत्राचा (बिल्टअप एरिया) वापर करून हे संकुल उभारले जाणार आहे. सहा ओव्हल मैदानाइतके हे बांधकाम क्षेत्र असणार आहे हे विशेष. न्यायालयाच्या इमारतीत ७५ कोर्टरुम असणार असून दोन न्यायमूर्तींसाठी एक अशी स्वतंत्र उद््वाहके यात असणार आहेत. प्रतीक्षालय, वाहनतळाची जागा, सभागृह, उपहारगृह आदी सुविधांचाही यात समावेश असणार आहे. न्यायालयाच्या इमारतीची उंची ७० मीटर अर्थात २० मजली इमारती इतकी असणार आहे. दरम्यान, या इमारतींचा आराखडा २५ वास्तूरचनाकारांच्या माध्यमातून तयार करण्यात आला आहे.