लग्नबंधनात अडकला भारताला विश्वचषक जिंकवून देणारा कर्णधार; जाणून घ्या नववधूबद्दल

भारताला १९ वर्षांखालील विश्वचषक जिंकून देणाऱ्या उन्मुक्त चंदने नुकतीच लग्नगाठ बांधली आहे.उन्मुक्तने सिमरन खोसलासोबत २१ नोव्हेंबर रोजी लग्नगाठ बांधली. सिमरन ही फिटनेस ट्रेनर आणि पोषणतज्ज्ञ आहे.अगदी मोजक्या पाहुण्यांच्या उपस्थितीत हा लग्नसोहळा पार पडला.सध्या सोशल मीडियावर त्यांच्या लग्नाचे फोटो व्हायरल होत आहे.२८ वर्षीय उन्मुक्तला अमेरिकेतील ट्वेन्टी-२० लीगमध्ये खेळायचे असल्याने त्याने भारतीय क्रिकेटशी संलग्न सर्व क्रिकेट प्रकाराला अलविदा केला.२०१२मध्ये ऑस्ट्रेलियात झालेल्या युवा (१९ वर्षांखालील) विश्वचषक क्रिकेट स्पध्रेत चंदच्या नेतृत्वाखाली भारताने जेतेपदावर नाव कोरले होते. ऑस्ट्रेलियाविरुद्धच्या अंतिम फेरीत चंदनेच नाबाद १११ धावांची धडाकेबाज खेळी साकारली होती.परंतु चंदला आंतरराष्ट्रीय क्रिकेटमध्ये पदार्पणाची संधी मिळाली नाही.चंदने ६७ प्रश्रम श्रेणी सामन्यांत आठ शतक आणि १६ अर्धशतकांसह ३,३७९ धावा केल्या.'आयपीएल'मध्ये त्याने दिल्ली डेअरडेव्हिल्स (आताचे दिल्ली कॅपिटल्स), मुंबई इंडियन्स आणि राजस्थान रॉयल्स या संघांचे प्रतिनिधित्व केले.परंतु 'आयपीएल'सह अन्य स्थानिक स्पर्धामध्ये सातत्याने छाप पाडण्यात अपयशी ठरल्यामुळे भारताकडून सामना खेळण्याची संधी त्याच्या वाट्याला आलीच नाही. अमेरिकेत उन्मुक्तने दमदार सुरुवात करत आपला नवा प्रवास सुरू केला.आता त्याने आणखी एक खास कामगिरी आपल्या नावावर केली आहे.बिग बॅश लीगमध्ये (BBL) सामील होणारा तो पहिला भारतीय पुरुष क्रिकेटपटू ठरला आहे.(सर्व फोटो सौजन्य : उन्मुक्त चंद / इन्स्टाग्राम)