T20 World Cup 2022 : टी-२० विश्वचषकासाठी भारताची तयारी सुरू, ‘या’ तीन खेळाडूंचा होऊ शकतो संघात समावेश

यूएईमध्ये सुरू असलेली आशिया चषक स्पर्धा सध्या अंतिम टप्प्यात आहे. ११ सप्टेंबर रोजी या स्पर्धेतील अंतिम लढत होईल. पाकिस्तान विरुद्ध श्रीलंका यांच्यात ही अंतिम लाढत होणार आहे. आशिया चषक स्पर्धेत भारताने निराशाजनक कामगिरी केली. भारताचे आव्हान सुपर-४ फेरीतच संपुष्टात आले. दरम्यान, या स्पर्धेनंतर भारतीय संघाने आपला मोर्चा आगामी टी-२० विश्वचषकाकडे वळवला आहे. भारतीय संघाकडून या स्पर्धेत चांगली कामगिरी करण्यासाठी योजना आखली जात आहे. तसेच खेळाडू कसून सराव करत आहेत. टी-२० विश्वचषक स्पर्धेसाठी भारतीय संघाची अद्याप घोषणा झालेली नाही. त्यामुळे भारतीय टीममध्ये यावेळी कोणाला संधी मिळणार याकडे सर्वांचेच लक्ष लागले आहे. या स्पर्धेसाठी भारताच्या आघाडीच्या तीन खेळाडूंची निवड केली जाऊ शकते. उमरान मलिक, शार्दुल ठाकूर तसेच मोहम्मद शमी या खेळाडूंना भारतीय संघात स्थान दिले जाऊ शकते. मोहम्मद शमी हा वेगवान गोलंदाज आहे. हा एक अनुभवी खेळाडू आहे. आयपीएल २०२२ मध्ये खेळताना त्याने चांगली कामगिरी केली होती. त्यामुळे त्याच्या अनुभवाचा संघाला उपयोग होऊ शकतो. शार्दुल ठाकूरला आशिया चषक स्पर्धेत संधी देण्यात आली नाही. मात्र टी-२० विश्वचषक स्पर्धेसाठी त्याची संघात निवड केली जाऊ शकते. तो गोलंदाजी आणि फलंदाजी अशा दोन्ही विभागांत चांगली कामगिरी करू शकतो. उमरान मलिक वेगवान गोलंदाज आहे. तो १५० किमी प्रतितासाच्या वेगाने गोलंदाजी करतो. त्यामुळे आगामी टी-२० विश्वचषकासाठी त्याची निवड केली जाऊ शकते. आयपीएल २०२२च्या हंगामात त्याने चांगली कामगिरी करून दाखवली होती. त्यामुळे उमरानला टी-२० विश्वचषक स्पर्धेत संधी दिली जाऊ शकते असे म्हटले जात आहे.