भारत-पाक सामन्यापूर्वी स्टेडियमचं अभेद्य किल्ल्यात रुपांतर, बॉम्ब निकामी पथकासह ११ हजार सुरक्षा कर्मचारी तैनात

World Cup 2023: भारत आणि पाकिस्तान (IND Vs PAK) पुन्हा एकदा ICC विश्वचषकात आमनेसामने येणार आहेत. अहमदाबादच्या नरेंद्र मोदी स्टेडियमवर १४ ऑक्टोबरला दोन्ही संघ भिडतील. हा सामना विश्वचषकातील सर्वात महत्त्वाच्या सामन्यांपैकी एक आहे. भारत आणि पाकिस्तान सामन्यापूर्वी अहमदाबादमधील नरेंद्र मोदी स्टेडियमचं रुपांतर अभेद्य किल्ल्यामध्ये केलं आहे. भारत-पाकिस्तान स्पर्धेच्या पार्श्वभूमीवर स्टेडियम परिसरात कडेकोट सुरक्षा व्यवस्था ठेवण्यात आली आहे. या स्पर्धेसाठी संपूर्ण अहमदाबाद शहरात विविध दलाचे ११ हजारांहून अधिक कर्मचारी तैनात करण्यात येणार आहेत. मीडिया रिपोर्ट्सनुसार, सुरक्षेत काउंटर-टेरर फोर्स, नॅशनल सिक्युरिटी गार्ड (NSG), रॅपिड अॅक्शन फोर्स (RAF), होमगार्ड आणि गुजरात पोलिसांचा समावेश आहे. याशिवाय सुरक्षा जवानांसह बॉम्ब निकामी पथकेही तैनात करण्यात आली आहेत. सामन्यादरम्यान बॉम्ब निकामी पथकाशिवाय एनडीआरएफ आणि एसडीआरएफच्या तुकड्याही तैनात असतील. भारत-पाकिस्तान सामन्यादरम्यान नरेंद्र मोदी स्टेडियम बॉम्बने उडवून देण्याची धमकी अहमदाबाद पोलिसांना ई-मेलद्वारे मिळाली होती. भारत आणि पाकिस्तान यांच्यातील क्रिकेट सामन्याची संपूर्ण जग वाट पाहत आहे. अशा परिस्थितीत विश्वचषकासारख्या मोठ्या स्पर्धेत दोन्ही संघ आमनेसामने येणार असल्याने क्रिकेटप्रेमींची उत्कंठा शिगेला पोहोचली आहे. (सर्व छायाचित्रे: पीटीआय)