PHOTOS : चारही वेदांमधील मंत्रोच्चारांद्वारे आशीर्वाद घेऊन राज ठाकरे पुण्यातून औरंगाबादच्या सभेसाठी झाले रवाना

महाराष्ट्र दिनी म्हणजे १ मे रोजी(उद्या) औरंगाबादमध्ये मनसे अध्यक्ष राज ठाकरे यांची सभा होणार आहे. (फोटो - आशिष काळे आणि सागर कासार) या बहुचर्चित सभेसाठी महाराष्ट्र नवनिर्माण सेनेचे अध्यक्ष राज ठाकरे हे आज सकाळी पुण्याहून औरंगाबादकडे रवाना झाले. मात्र तत्पूर्वी ही आणि भविष्यातील सर्व सभा निर्विघ्नपणे पार पडाव्यात यासाठी राज ठाकरे यांना आशीर्वाद देण्यात आले. यासाठी पुण्यातील जवळपास १०० ते १५० पुरोहितांनी चारही वेदांमधील मंत्रोच्चारांचे पठण करत राज ठाकरे यांना आशीर्वाद दिला. यासाठी पुण्यातील राजमहाल येथे सकाळीच ब्रह्मवृंद मोठ्यासंख्येने हजर देखील झाले होते. आज पुण्यातून राज ठाकरे औरंगाबादला रवाना होणार असल्याने सकाळपासूनच मनसे पदाधिकारी, कार्यकर्त्यांसह माध्यम प्रतिनिधींनी मोठ्या संख्यने राजमहाल येथे गर्दी केली होती. सकाळी साधारण दहा वाजेच्या सुमारास राज ठाकरे बाहेर आले, यानंतर त्यांना उपस्थित पुरोहितांनी मंत्रोच्चार करून आशीर्वाद दिले. राज ठाकरे यांच्या उद्याच्या आणि पुढील सभेत यश प्राप्त होण्यासाठी संपूर्ण पुणे शहराच्या वतीने आणि पुरोहित वर्गाच्या वतीने आम्ही मंत्रांद्वारे आशीर्वाद देणार असल्याचे गुरुजी मनोज पारगावकर म्हणाले. दीर्घ आयुष्य, आरोग्य, ऐश्वर्य प्राप्त व्हावे आणि त्यांची जी हिंदूजननायकाची भूमिका आहे. त्या करिता मंत्रांचा, दैवतांचा आशीर्वाद आणि पाठींबा देण्यासाठी आम्ही आलो आहोत, असंही ते म्हणाले. तसेच, ऋग्वेद, यजुर्वेद, सामवेद आणि अथर्ववेद या चारही वेदांमधील मंत्रांचा आशीर्वाद दिला जाणार असल्याची त्यांनी यावेळी माहिती दिली होती. राज ठाकरे यांची बहुचर्चित अशी औरंगाबाद येथील सभा उद्या होणार असून त्याकडे सर्वच राजकीय पक्षांचे लक्ष आहे. औरंगाबादला जात असताना राज ठाकरे वढू-तुळपूर येथील छत्रपती संभाजी महाराजांच्या समाधी स्थळाला भेट देणार आहेत. या ठिकाणी राज ठाकरे समाधी स्थळाचं दर्शन घेऊन पुढील दौऱ्यासाठी निघणार असल्याचं, मनसे शहारध्यक्ष साईनाथ बाबर यांनी स्पष्ट केलंय. राज ठाकरेंच्या या सभेबाबत सर्वांनाच उत्सुकता आहे. शिवाय, या सभेच्या अगोदर देखील परवानगी नाट्य रंगल्याचं दिसून आलं होतं, अखेर ही सभा नियम आणि अटींसह होणार आहे. औरंगाबादेतील राजकीय परिस्थिती पाहता, राज ठाकरे नेमकं काय बोलतील आणि त्याचे काय पडसाद उमटू शकतात, याबाबत देखील चर्चा सुरू आहे. राज ठाकरेंची आज चित्रपट दिग्दर्शक केदार शिंदे आणि अभिनेता अंकुश चौधरी यांनी देखील भेट घेतली. औरंगाबादच्या सभेसाठी राज ठाकरे रवाना होत असताना शंखनाद देखील केला गेला.