Photos : तीन कोटींचे कर्ज, महागड्या गाड्या अन् जमीन…अजित पवार आणि त्यांच्या पत्नीची एकूण संपत्ती माहितीये का?

राज्याचे माजी उपमुख्यमंत्री आणि सध्याचे विरोधी पक्षनेते अजित पवार यांचा आज ६३वा वाढदिवस आहे. राजकीय कारकिर्दीसोबतच ते अनेकदा त्यांच्या भाषणामुळे आणि वक्तव्यांमुळे चर्चेत असतात. त्यांच्या स्टाइलचा, काम करण्याच्या पद्धतीचा वेगळा असा चाहता वर्गही आहे. राष्ट्रवादी कॉंग्रेस पक्षाचे ते बारामती येथील आमदार आहेत. माविआ सरकारच्या काळात ते पुण्याचे पालकमंत्री होते. अजित पवार यांच्या वाढदिवसानिमित्त त्यांच्या एकूण मालमत्तेवर एक नजर टाकूया. अजित पवार आणि त्यांच्या पत्नी सुनेत्रा पवार यांच्याकडे एकूण ७५ कोटी ४८ लाखांची संपत्ती आहे. २०१८-१९ वर्षात अजित पवार यांचे एकूण उत्पन्न ६२ कोटी ४८ लाख इतके होते. तर या काळात सुनेत्रा पवार यांचे उत्पन्न तीन कोटींपेक्षा जास्त होते. अजित पवार यांच्या नावे होंडा एकोर्ड, होंडा सीआरव्ही, टोयोटो कॅम्ब्रे या तीन कार आहेत. याशिवाय त्यांच्याकडे दोन ट्रॅक्टर, चार ट्रेलर आहेत. अजित पवार यांच्याकडे असलेल्या गाड्यांची एकूण किंमत सुमारे ८९ लाख रुपये इतकी आहे. त्यांच्या पत्नी सुनेत्रा यांच्याकडेही इनोवा क्रिस्टा ही गाडी, एक ट्रॅक्टर आणि एक ट्रेलर आहे. अजित पवार यांच्याकडे १३ लाख ९० हजारांचे, तर पत्नीकडे ६१ लाख ५६ हजारांचे सोने आणि चांदीचे दागिने आहेत. अजित पवार आणि त्यांच्या पत्नी यांच्या नावावर ५१ कोटी ७५ लाख किंमतीची जमीन आहे. सोनगाव, काटेवाडी, ढेकळवाडी येथे पवार दाम्पत्याच्या मालकीची शेतजमीन आहे. तर इंदापूर, लोणीकंद, जळोची, काटेवाडी येथेही त्यांच्या नावावर जमीन आणि बांधकामे आहेत. याशिवाय त्यांनी शेअर आणि इतर ठिकाणी सुमारे ४९ लाखांची गुंतवणूक केली आहे. अजित पवार यांनी १ कोटी ५ लाख रुपयांचे कर्ज घेतले आहे. तर त्यांच्या पत्नी सुनेत्रा यांच्या नावावर २ कोटी ६८ लाखांचे कर्ज आहे. एकूण संपत्तीतील सुमारे २७ कोटी २५ लाख रुपयांची मालमत्ता अजित पवार यांच्या नावावर आहे. तर सुनेत्रा पवार यांच्या नावावर ४७ कोटी १६ लाखांची संपत्ती आहे. अजित पवार आणि सुनेत्रा पवार यांना पार्थ व जय ही दोन मुले आहेत. अजित पवार यांचे कुटुंबियांसोबतचे फोटो अनेकदा सोशल मीडियावर चर्चेत असतात. (सर्व फोटो : अजित पवार, सुनेत्रा पवार/ फेसबुक)