PM Modi Birthday Special: ना घर, ना बंगला, ना गाडी…आमदार, खासदारांपेक्षाही कमी आहे पंतप्रधान मोदींची एकूण संपत्ती

देशाचे पंतप्रधान नरेंद्र मोदी यांचा आज ७२वा वाढदिवस आहे. देशातील सर्वाधिक लोकप्रिय नेत्यांपैकी मोदी एक आहेत. जनतेच्या मनातही त्यांची खास प्रतिमा आणि आदर आहे. म्हणूनच मोदींनी सामाजिक हिताच्या दृष्टीने एखादे आवाहन केल्यास त्याला सर्वसामान्यांकडून मोठया प्रमाणावर प्रतिसाद मिळतो. करोना काळातही याची प्रचिती आली आहे. चहावाला ते देशाचे पंतप्रधान असा त्यांचा थक्क करणारा प्रवास सगळ्यांसाठी प्रेरणादायी आहे. पंतप्रधान मोदी त्यांच्या स्टाइलसाठीही ओळखले जातात. कपड्यांपासून गॉगलपर्यंत ते अनेक महागड्या गोष्टी वापरतात. यासाठी ते लाखो रुपये खर्च करतात. परंतु, असं असलं तरी त्यांच्याकडे असलेली एकूण संपत्ती ही कित्येक आमदार आणि खासदारांपेक्षाही कमी आहे. आज मोदींच्या वाढदिवशी त्यांच्या संपत्तीवर एक नजर टाकूया. ऑगस्ट महिन्यात पंतप्रधान कार्यालयाकडून त्यांच्या संपत्तीबद्दल माहिती देण्यात आली होती. यानुसार, पंतप्रधान नरेंद्र मोदींच्या संपत्तीत २०२१-२२ वर्षात एकूण २६.१३ लाखांची वाढ झाली आहे. पंतप्रधान कार्यालयाकडून पुरविण्यात आलेल्या माहितीत स्थावर मालमत्तेपुढील कॉलममध्ये मोदींनी NIL असा उल्लेख केला आहे. याचाच अर्थ मोदींच्या नावावर कोणत्याही प्रकारची स्थावर मालमत्तेची नोंद नाही. म्हणजेच ‘पंतप्रधान आवास योजना’ सुरू करणाऱ्या मोदींचं स्वत:चं घर नाही. गुजरातमधील गांधीनगर भागात २०२०-२१ वर्षात मोदींच्या नावावर १४ हजार १२५ चौ किमी बंगल्यातील एक चतुर्थांश भाग होता. बंगल्यातील ३ हजार ५३१ चौ किमी जागेचे मोदी मालक होते. या मालमत्तेतील सुमारे १.१०कोटी इतके बाजारमूल्य असलेले २५ टक्के मालकीचे शेअर पंतप्रधान मोदींनी दान केले आहेत. स्थावर मालमत्तेप्रमाणेच मोदींनी जंगम मालमत्तेतील वाहने या कॉलम पुढेही NILL असा उल्लेख केला आहे. मोदींच्या बॅंक खात्यात फक्त ४६ हजार ५५५ रुपये आहेत. मोदींनी पोस्टमध्ये ९लाख ५ हजार १०५ रुपयांची तर एलआयसीमध्ये १ लाख ८९ हजार ३०५ रुपयांची गुंतवणूक केली आहे. याशिवाय मोदींकडे सोन्याचे दागिनेही आहेत. याची एकूण किंमत १ लाख ७३ हजार रुपये इतकी आहे. मोदी एकूण २ कोटी २३ लाख ८२ हजार ५०४ रुपये मालमत्तेचे मालक आहेत. २०२१-२२ वर्षात मोदींच्या संपत्तीत २६ लाखांची वाढ झाल्याची माहिती पंतप्रधान कार्यालयाने दिली होती. (सर्व फोटो : पंतप्रधान नरेंद्र मोदी/ फेसबुक) (हेही पाहा : मिशन २०२४, महाराष्ट्रातील ‘या’ चार नेत्यांवर लोकसभेची जबाबदारी)