Photos | चर्चेतला वाघ : ताडोबा-अंधारी व्याघ्रप्रकल्पाची शान ‘छोटी तारा’

'छोटी तारा' नावाप्रमाणेच तारका... मग तिचे बछडेही तारकांप्रमाणे नसणार तर काय! ताडोबा-अंधारी व्याघ्रप्रकल्पाची शान असणारी ही वाघीण कायम तिच्या बछड्यांसह पर्यटकांना अगदी सहज दर्शन देते. तिच्या बछड्यांबरोबरच तिच्याही अदा पर्यटकांना खिळवून ठेवतात. या 'छोटी तारा'चा एक किस्सा अजूनही पर्यटकांच्या तोंडी आहे. तो म्हणजे अस्वलाबरोबर तिची होता होता राहिलेली लढाई. 'छोटी तारा' जिथे बसली होती, त्याच वाटेवरुन अस्वल जात होते. एका क्षणाला दोघेही समोरासमोर आले. तिने शेपटी हलवली आणि अस्वलावर हल्ला करण्याच्या तयारीत ती आली, पण.. अचानक अस्वल दोन्ही पायावर उभे राहिले. 'छोटी तारा' थोडी घाबरली. त्या दोघांचीही समोरासमोर असलेली आक्रमणाच्या तयारीतील छबी अनेकांनी त्यांच्या कॅमेऱ्यात टिपली. थोडावेळ दोघेही तसेच उभे राहिले आणि मग काय झाले कुणास ठाऊक! त्या अस्वलानेही रस्ता बदलला आणि 'छोटी तारा'देखील आपल्या वाटेने निघून गेली. हा अलीकडच्या काही महिन्यातीलच किस्सा. येथे येणाऱ्या प्रत्येक पर्यटकाला पर्यटक मार्गदर्शक तो सांगतो आणि मग 'छोटी तारा' आणि तिच्या बछड्याला पाहण्याची उत्सुकता अधिकच ताणली जाते. छायाचित्रे - धनंजय खेडकर, सुरभी जयस्वाल (हेही पाहा : कपाळावर ‘डब्ल्यू’ खूण असणारी ताडोबातील शांत व संयमी वाघीण)