Photos: नितीन गडकरी म्हणतात स्ट्रीट फूडच्या बाबतीत मुंबई जगात भारी! म्हणाले, “सुरक्षारक्षकांना घरी पाठवून…”

भाजपा नेते आणि केंद्रीय मंत्री नितीन गडकरी यांनी ‘इंडिया टुडे कॉनक्लेव्ह’मध्ये हजेरी लावली. या कार्यक्रमातील मुलाखतीत विचारलेल्या प्रश्नांना त्यांनी दिलखुलासपणे उत्तरं दिली. नितीन गडकरींनी मुलाखतीत मुंबईतील स्ट्रीट फूडबद्दलचा किस्साही सांगितला. गडकरी हे खवय्ये आहेत. याआधीही अनेक मुलाखतींमधून त्यांनी मुंबई आणि तेथील रस्त्यांवर मिळणाऱ्या स्ट्रीट फूडबद्दल असलेलं त्यांचं प्रेम व्यक्त केलं आहे. ‘इंडिया टुडे’ला दिलेल्या मुलाखतीतही पुन्हा एकदा त्यांनी मुंबईतील खाद्यपदार्थांबद्दल भाष्य केलं. ते म्हणाले, “मुंबईत चांगले खाद्य पदार्थ हे रस्त्यावरच मिळतात. मुंबईसारखं स्ट्रीट फूड संपूर्ण जगात कुठेच मिळत नाही. मुंबईतील स्ट्रीट फूडचा दर्जाही उत्तम आहे”. यावेळी मित्रांबरोबरचा एक किस्साही नितीन गडकरी यांनी सांगितला. “माझ्याबरोबर झेड प्लस सिक्युरीटी असते. ५० पोलिसांबरोबर फुटपाथवर गेलो तर ते रस्ता बंद करतील”, असं त्यांनी सांगितलं. पुढे ते म्हणाले, “त्यामुळे झोपायला जात आहे असं सांगून माझ्या सुरक्षारंक्षकांना मी घरी पाठवतो. त्यानंतर मी माझ्या मित्रांबरोबर मुंबईतील फुटपाथवरील पदार्थांचा आस्वाद घेतो”. मुंबईत आल्यानंतर गडकरी त्यांच्या नेहमीच्या ठरलेल्या जागीच जेवण करतात. मुलाखतीदरम्यान याबद्दलही त्यांना प्रश्न विचारण्यात आला. तेव्हा त्यांनी “हो हे खरं आहे. पण मी ठिकाणाचं नाव सांगणार नाही”, असं मजेशीर उत्तर दिलं. यावरुन नितीन गडकरींना मुंबईतील स्ट्रीट फूड किती आवडतं, हे दिसून येते. (सर्व फोटो : नितीन गडकरी/ फेसबुक) (हेही पाहा >> Photos : “दहा वर्षांचा बॅकलॉग…”; महेश मांजरेकरांचा चित्रपट पण चर्चा मात्र राज ठाकरे-मुख्यमंत्री एकनाथ शिंदे भेटीची)