Photos: चर्चेतला वाघ – बछड्यांवर अतोनात माया करणारी ताडोबाची ‘क्वीन’

'ती' जेवढी संवेदनशील, तेवढीच आक्रमकसुद्धा. बछड्यांसोबत तिचे जेवढे संवेदनशील प्रसंग पर्यटकांनी अनुभवले आहेत, तेवढाच पर्यटकांचा अति त्रास झाल्यानंतर तिचे रौद्र रुप देखील अनुभवले आहे. इतर वाघांमुळे तिच्या बछड्यांना धोका असल्याचे लक्षात आल्यानंतर लागलीच त्यांच्या संरक्षणसाठी तिने या वाघांसोबत मिलन करुन बछड्यांचे जगणे सुरक्षित केले आहे. ही तिच 'माया' आहे, जी ताडोबा-अंधारी व्याघ्रप्रकल्पाची 'क्वीन' म्हणूनही ओळखली जाते. अलीकडेच तिने पुन्हा एकदा बछड्यांना जन्म दिलाय आणि या नव्या पाहुण्यांना पाहण्यासाठी पर्यटकांची पावले या व्याघ्रप्रकल्पाकडे वळत आहेत. बछड्यांवर माया करणारी 'माया' दिसताच कॅमेऱ्याच्या बटणा पटापट दाबल्या जातात आणि त्यामुळे विचलीत झालेली ही वाघीण बछड्यांना घेऊन पुन्हा जंगलात खोल आत जाते. बछड्यांच्या सुरक्षेसाठी तिचे इतर वाघांशी जुळवून घेणे पर्यटकांना थोडे वेगळे वाटत असले तरीही ती शेवटी आई आहे. तिचा आणि बछड्यांचा जीव धोक्यात असल्याचे लक्षात येताच 'मटकासूर', 'गब्बर' या वाघांशी मिलनासाठी तयार झाली आणि बछड्यांचा जीव तीने वाचवला. या व्याघ्रप्रकल्पातील पांढरपवनी म्हणजे तिचा हक्काचा अधिवास. सर्व छायाचित्रे - युवराज पाटील (हेही पाहा : चर्चेतला वाघ – राजाप्रमाणे जगलेला ‘मिस्ट्री मेल’)