रोहित पवार शर्ट इन का करत नाही? पायात कोल्हापुरीच का घालतात? स्वत:च केला खुलासा

रोहित पवार हे महाराष्ट्रातील राजकीय व्यक्तीमत्वांपैकी एक लोकप्रिय नाव. शरद पवारांचे नातू आणि राष्ट्रवादी काँग्रेसचे आमदार म्हणून ते कायमच चर्चेत असतात. महाविकासआघाडीची सत्ता असताना आणि आता सत्ता गेल्यानंतरही ते सातत्याने चर्चेत असल्याचे पाहायला मिळते. रोहित पवारांच्या राजकीय भूमिकांसह त्यांच्या स्टाईलचीही चर्चा सातत्याने रंगताना दिसते. रोहित पवार हे कायमच जिन्स, इन न करता घातलेले शर्ट, जॅकेट, स्कार्फ अशा लूकमध्ये दिसतात. त्याबरोबर ते कायमच पायात कोल्हापुरी चप्पल, मोजडी, लोफर्स असे परिधान केलेले असतात. तसेच ते अनेकदा रंगबेरंगी शर्टही परिधान करतात. रोहित पवारांच्या या हटके स्टाईलबद्दल अनेकांना प्रश्न पडलेला असतो. नुकतंच एका कार्यक्रमात त्यांनी त्यांच्या या स्टाईल करण्यामागची काही कारणं सांगितली आहेत. यावेळी त्यांनी उपस्थित लोकांपैकी किती लोक अशी स्टाईल करतात हे विचारले. त्यावर उपस्थित असलेल्या बहुतांश लोकांनी हात वर केला आणि त्याला होकार दिला. त्यापुढे ते म्हणाले, "मी या सर्वांचा कार्यकर्ता आहे. त्यामुळे हे जसे वागतात तसा मी वागतो. मग यात फरक काय? असे त्यांनी म्हटले." "कॉलेजमध्ये असताना व्यायाम करायचो. पण आता वजन वाढलंय, त्यामुळे शर्ट गच्च व्हायला लागलेत." "आपण कायमच आपल्या स्टाईलमध्ये राहायचं. लोकांच्या चांगल्या गोष्टी नक्कीच ऐकायच्या." "पण सर्वच गोष्टी जर तुम्ही त्यांच्या ऐकायला लागल्यात तर मग तुमची स्टाईलच राहणार नाही." "त्यामुळे आपण आपली स्टाईल ठरवायला हवी." "मला अनेकांनी राजकारणात आल्यानंतर पांढऱ्या रंगाचा शर्ट परिधान करण्याचा सल्ला दिला होता." "मी त्यावेळी त्यामागील कारणही त्यांनी विचारले होते." त्यावर ती लोक मला म्हणालेली, "पांढरे कपडे घातले की आपली प्रतिमा स्वच्छ दिसते." "पण हे दाखवायचं कशाला? आपण स्वच्छ प्रतिमा असल्यासारखे वागलो तर लोकांना ते कळेलच." "माझ्या घरी माझ्या केसांवरुन फार भांडण होतात." "माझी पत्नी कुंती आणि दोन मुलं मला कायम केस काळे करण्याचा सल्ला देतात." "माझे केस हे कृत्रिमरित्या पांढरे झालेले नाही. ते नैसर्गिकरित्या पांढरे झाले आहेत." "माझं वय हे ३७ पूर्ण झालं आहे. आता ३८ सुरु आहे." "मी राजकारणात आलो होतो, तेव्हा हे केस २५ टक्के पांढरे झाले होते." "वय कमी होतं त्यामुळे तेव्हा कोणीही गांभीर्याने घेत नव्हतं." "पण त्यावेळी या केसांनी फार मदत केली." "आता हे नैसर्गिकरित्या झालेत आणि राजकारणात आल्यानंतर ते ७० टक्के झाले आहेत." "काय तरी काम केलं, विचार करतो म्हणून केस पांढरे झालेत असे मी लोकांना सांगतो." "आपण आपल्या स्टाईलमध्ये राहायचं. खूप लपवालपवी करायची नाही."