पत्नीच्या जाचाला कंटाळून मोडला १६ वर्षांचा संसार! जाणून घ्या, ‘मास्टरशेफ इंडिया’ फेम कुणाल कपूरचं घटस्फोट प्रकरण

भारतातील लोकप्रिय कार्यक्रमांपैकी एक असलेला शो म्हणजे 'मास्टरशेफ इंडिया'. तर याच कार्यक्रमामुळे देशभरात प्रसिद्ध झालेला चेहरा म्हणजे शेफ कुणाल कपूर. सध्या कुणाल वेगळ्याच कारणामुळे चर्चेत आहे. कुणालने आपल्या पतीपासून घटस्फोट घेतला आहे. काल म्हणजेच २ एप्रिल रोजी दिल्ली उच्च न्यायालयाने कुणालच्या घटस्फोटाच्या याचिकेला मंजूरी दिली आहे. कुणालला पत्नीकडून मिळणारी हीन वागणूक क्रूरतेसमान असून याच आधारावर दिल्ली हायकोर्टाने या घटस्फोटाला परवानगी दिली आहे. कुणालने २००८ साली लग्न केले आणि त्याच्या पत्नीने २०१२ साली मुलाला जन्म दिला. 'मास्टरशेफ इंडिया' या कार्यक्रमाआधी कुणाल आपल्या पत्नीसह 'नच बलीये' या डान्स प्रोग्राममध्येही सहभागी झाला होता. काही काळानंतर पत्नीचे कुणालसाठीचे वागणे बदलले. कुणालने आपल्या पत्नीवर आरोप केले की तिने कुणालबरोबरच त्याच्या पालकांनाही कधीच सन्मान दिला नाही आणि ती त्यांना सातत्याने अपमानित करायची. कुणाल कपूरने याप्रकरणी दिल्ली हायकोर्टात धाव घेण्यापूर्वी कौटुंबिक न्यायालयात याचिका दाखल केली होती. मात्र येथे त्याची याचिका फेटाळण्यात आली होती. यावरही हायकोर्टाने आपले मत मांडत सांगितले की पत्नीचे वर्तन विवाह कायद्याच्या कलम १३ (१) अंतर्गत येते. त्यामुळे कौटुंबिक न्यायालयाने कुणालची घटस्फोटाची याचिका फेटाळून चुकी केली. कुणाल कपूरला त्याच्या पत्नीने दिलेली वागणूक सन्मान आणि सहानुभूतीपूर्ण नसल्याचे उच्च न्यायालयाने म्हटले आहे. उच्च न्यायालयाने असेही म्हटले की, सार्वजनिक ठिकाणी पती/पत्नीविरुद्ध निष्काळजीपणाचे कोणतेही कृत्य करणे, हे कायद्याच्या दृष्टीने क्रूरतेसमान आहे. न्यायमूर्ती सुरेश कुमार कैत आणि न्यायमूर्ती नीना बन्सल कृष्णा यांच्या खंडपीठाने सांगितले की, "जर एखाद्या जोडीदाराचे दुसऱ्याशी असे वागणे असेल तर तो विवाहाच्या मूळ भावनेचा अनादर आहे." दुसरीकडे कुणाल कपूरच्या पत्नीने, कोर्टाची दिशाभूल करण्यासाठी आपल्यावर खोटे आरोप केल्याचा दावा केला होता. कुणाल कपूरच्या पत्नीने सांगितले की, ती नेहमीच कुणालशी तिच्या आयुष्याच्या जोडीदाराप्रमाणे बोलायची आणि त्याच्याशी एकनिष्ठ होती. यावेळी, कुणाल कपूरने तिला अंधारात ठेवले आणि घटस्फोट घेण्यासाठी खोट्या कथा रचल्याचा आरोप तिने केला आहे. इतकंच नाही तर, तिने असेही सांगितले आहे की प्रसिद्धी मिळाल्यानंतर कुणालचे विवाहबाह्य संबंध होते. अशाही चर्चा आहेत की याच विवाहबाह्य संबंधांमुळेच कुणालने आपल्या पत्नीबरोबर घटस्फोट घेतला आहे. (सर्व फोटो : कुयाल कपूर/इन्स्टाग्राम)