Rahul Gandhi : राहुल गांधी आणि मायावती यांच्यात आरोपांच्या फैरी का झडत आहेत? या वादाचं कारण काय?

इंडिया आघाडीत मायावती न आल्याने राहुल गांधींंनी व्यक्त केली नाराजी

उत्तर प्रदेशच्या रायबरेली या ठिकाणी झालेल्या सभेत राहुल गांधी म्हणाले होते की, भाजपाच्या विरोधात आम्ही एकत्र येऊन लढलो. मात्र मायावतींनी आणि त्यांच्या पक्षाने आम्हाला साथ दिली नाही. आम्हाला याचं दुःख झालं. जर मायावतीही इंडिया आघाडीत आल्या असत्या तर भाजपाला विजय मिळाला नसता. मात्र यानंतर मायावतींनी राहुल गांधींना असा सल्ला दिल्ला आहे की इतरांना उपदेश करण्यापेक्षा जरा स्वतःच्या पायाखाली काय जळतं आहे ते बघा. मायावती दिल्ली विधानसभा निवडणुकीचं उदाहरण देऊन काँग्रेसवर टीका करत आहेत. कारण या निवडणुकीत काँग्रेसच्या आधी आम आदमी पार्टीने स्वतंत्र निवडणूक लढवण्याची घोषणा केली होती. लोकसभा निवडणुकीच्या वेळी आम आदमी पार्टीने इंडिया आघाडीत येणं पसंत केलं होतं. तरीही विधानसभा निवडणूक वेगळी लढवली. हे उदाहरणही मायावतींनी राहुल गांधींना दिलं आहे. इंडियन एक्स्प्रेसने हे वृत्त दिलं आहे. दिल्ली विधानसभा निवडणुकीच्या प्रचारात काँग्रेस आणि आप या दोन पक्षांनी एकमेकांवर टीकाही केली होती. लोकसभा निवडणुकीत काँग्रेस आणि आपने दिल्लीच्या सात लोकसभा जागांवर आघाडी केली होती. तरीही या सगळ्या जागा भाजपानेच जिंकल्या होत्या.

संजय राऊत नेमकं काय म्हणाले?

दरम्यान या सगळ्या आरोपांच्या फैरी सुरु असतानाच संजय राऊत यांनी म्हटलं आहे की आम्ही सपा आणि काँग्रेसच्या आघाडीची जादू लोकसभा निवडणुकीत पाहिली आहे. ज्या जागा गेल्या त्या मायावतींमुळे गेल्या. कारण त्या इंडिया आघाडीत आल्या नाहीत. दरम्यान भारतीय समाज पार्टीचे नेते सुहेलदेव यांनी म्हटलं आहे की सपा म्हणजेच समाजवादी पक्ष आणि काँग्रेस पक्ष दोन्ही भाजपाच्या बी टीम आहेत. वेळोवेळी त्यांनी भाजपाची मदत केली आहे. आता या आरोपांच्या फैरी आणखी किती दिवस चालतात आणि त्याला कुठलं वळण लागतं हे पाहणंही महत्त्वाचं असणार आहे.