बंगालचे नवे पोलिस महासंचालक राजीव कुमार कोण आहेत? ज्यांच्यासाठी ममता बॅनर्जींनी केले होते आंदोलन!

२०१९ साली कुमार यांच्या घरावर छापेमारी

शारदा चिटफंडातील गैरव्यवहाराप्रकरणी राजीव कुमार यांच्या घरावर सीबीआयने २०१९ सालातील फेब्रुवारी महिन्यात छापेमारी केली होती. तेव्हा बॅनर्जी यांनी या छापेमारीचा विरोध करत केंद्र सरकारवर टीका केली होती. याच छापेमारीविरोधात त्यांनी ७० तासांसाठी आंदोलन केले होते. राजीव कुमार यांच्या विरोधात अटकेची कोणतीही कारवाई करू नये, असा निर्णय सर्वोच्च न्यायालयाने दिल्यानंतर बॅनर्जी यांनी आपले आंदोलन मागे घेतले होते.

राजीव आयआयटी रुरकीचे माजी विद्यार्थी

राजीव कुमार हे मुळचे उत्तर प्रदेशचे आहेत. ते आयआयटी रुरकीचे माजी विद्यार्थी आहेत. आयपीएस झाल्यानंतर सर्वप्रथम त्यांची चंदननगरचे उपविभागीय पोलिस अधिकारी म्हणून नियुक्ती करण्यात आली होती. त्यानंतर ते बीरभूम जिल्ह्याचे पोलिस अधीक्षक झाले. २००८ साली ते कोलकाता पोलिसांच्या स्पेशल टास्क फोर्सचे सहआयुक्त होते.

शारदा चिटफंडातील गैरव्यवहाराचे तपासप्रमुख

सध्या जरी ते ममता बॅनर्जी यांचे विश्वासू मानले जातात, तरी ममता बॅनर्जी २०११ साली मुख्यमंत्री झाल्यानंतर राजीव कुमार आणि बॅनर्जी यांच्यात बरेच मतभेद होते. काही उच्च पोलिस अधिकाऱ्यांनी कुमार यांच्या क्षमतांबाबत सांगितल्यानंतर ममता बॅनर्जी यांनी कुमार यांच्यावर विश्वास ठेवला. त्यानंतर जानेवारी २०१२ मध्ये कुमार यांची बिधाननगरचे पोलिस आयुक्त म्हणून नियुक्ती करण्यात आली. २०१३ साली शारदा चिटफंडातील गैरव्यवहार समोर आला. या प्रकरणाचा तपास करणाऱ्या विशेष पथकाचे कुमार यांनी नेतृत्व केले.

निवडणूक आयोगाच्या आदेशानंतर बदली

राजीव कुमार यांची २०१६ साली कोलकाता पोलिस आयुक्तपदी नियुक्ती करण्यात आली. याच काळात राजीव कुमार यांनी विरोधकांचे फोन टॅप केल्याचा आरोप करण्यात आला. या आरोपानंतर विधानसभा निवडणुकीच्या पार्श्वभूमीवर निवडणूक आयोगाने कुमार यांची बदली करण्याचा आदेश दिला. मात्र, निवडणूक झाल्यानंतर कुमार यांची पुन्हा आयुक्तपदी नेमणूक करण्यात आली.