पुणे : मार्केट यार्डात सोसायटीच्या आवारात शिरुन वाहनांची जाळपोळ

पुणे : सोसायटीच्या आवारात शिरुन मोटार, तसेच दोन दुचाकीं पेटवून देणाऱ्या तिघांना मार्केट यार्ड पोलिसांनी अटक केली. याप्रकरणी दोन अल्पवयीनांविरुद्ध गुन्हा दाखल करण्यात आला. याप्रकरणी निखिल चव्हाण (वय २५), महेंद्र आहुजी (वय २५, दोघे रा. मार्केट यार्ड), आदित्य साखरे (वय २१, रा. कोंढवा खुर्द) यांना अटक करण्यात आली. याबाबत वीरेंद्र चंद्रकांत अमराळे (वय ३८, रा. गगनविहार सोसायटी, मार्केट यार्ड) यांनी मार्केट यार्ड पोलीस ठाण्यात फिर्याद दिली आहे.

आरोपी चव्हाण, आहुजी, साखरे आणि दोन अल्पवयीन साथीदार गगन विहार सोसयाटीत शिरले. सोसायटीच्या आवारातील दोन दुचाकी, एका मोटारीवर पेट्रोल ओतून पेटवून दिल्या. वाहनांनी पेट घेतल्याने सोसायटीच्या आवारात मोठा धूर झाला. सोसायटीच्या आवारात घबराट उडाली. वरिष्ठ पोलीस निरीक्षक माया देवरे यांनी घटनास्थळी भेट दिली. पोलिसांनी तपास करून तिघांना अटक केली असून, सहायक पोलीस निरीक्षक मोरे तपास करत आहेत.

आणखी वाचा-संपूर्ण पुणे शहराचा पाणीपुरवठा १७ ऑक्टोबरला राहणार बंद, काय आहे कारण!

धनकवडी भागात दसऱ्याच्या दिवशी टोळक्याने कोयते उगारून दहशत माजविली होती. टोळक्याने या भागातील वाहनांची तोडफोड केली होती. किरकोळ वादातून एका अल्पवयीनाने साथीदारांसह जनता वसाहत परिसरात दहशत माजवित वाहनांची तोडफोड केली. तोडफोडीत मोटारी, रिक्षा, दुचाकींसह सहा ते सात वाहनांचे नूकसान झाले. शहर, तसेच उपनगरात टोळक्याकडून दहशत माजविण्याचे प्रकार वाढीस लागले आहेत. कोयते, तसेच दांडकी उगारून वाहनांची तोडफोड केली जाते. वाहन तोडफोडीच्या घटनांमुळे या भागातील रहिवासी दहशतीखाली आहेत.