पुणे : कात्रज बाह्यवळण मार्गावर अवजड वाहनांना येत्या १५ ऑक्टोबरपासून कात्रजकडून किवळेकडे जाणाऱ्या आणि येणाऱ्या मार्गावर बंदी करण्यात आली आहे. जिल्हाधिकारी जितेंद्र डुडी यांनी त्याबाबतचे आदेश जारी केले आहेत. कात्रजकडून किवळेकडे जाणाऱ्या मार्गावर सकाळी ८ ते ११ या कालावधीत तर किवळे ते कात्रजकडे जाणाऱ्या मार्गावर सायंकाळी ५ ते रात्री ९ या कालावधीत जड आणि अवजड वाहनांना बंदी राहणार आहे. ही बंदी पुढील आदेश येईपर्यंत असेल, असे जिल्हाधिकारी डुडी यांनी या आदेशात नमूद केले आहे.
पुणे-बेंगलुरू महामार्ग क्रमांक ४८ आणि महामार्ग क्रमांक ४ कडे जाणाऱ्या मार्गिकेवर (जुना पुणे- मुंबई महामार्गावर) किवळेकडून कात्रजकडे जाणाऱ्या जड अवजड वाहनांना सायंकाळी ५ ते रात्री ९ वाजेपर्यंत बंदी करण्यात आली आहे, असेही या आदेशात नमूद करण्यात आले आहे. बंदी असलेल्या कालावधीत सातारा-सांगली-कोल्हापूर बाजूने बेंगलुरू महामार्गावरुन येणारी वाहने शिंदेवाडी टोलनाक्याच्या पुढे येणार नाहीत.
तसेच नवी मुंबई, ठाणे, रायगड बाजूने बेंगलुरू महामार्गावरुन जाणारी वाहने उर्से टोल नाक्याच्यापुढे आणि जुना मुंबई-पुणे महामार्गावरील वाहने वडगाव फाट्याच्या पुढे प्रवेश करणार नाहीत. अत्यावश्यक सेवेतील वाहने आणि पुणे शहरात अंतर्गत भागात जाणारी आणि येणारी वाहतूकीस हा बंदी आदेश लागू राहणार नाही, असेही आदेशात म्हटले आहे.