पुणे-पंढरपूर रस्त्यावर फलटणजवळील मलठण स्मशानभूमीजवळ शनिवारी (२४ डिसेंबर) पहाटे साडेतीनच्या सुमारास आमदार जयकुमार गोरे यांच्या गाडीचा भीषण अपघात झाला. यानंतर आता आमदार गोरे यांच्यावर पुण्यातील रुबी रुग्णालयात उपचार सुरू आहेत. राज्याचे आरोग्यमंत्री तानाजी सावंत यांनी स्वतः रुबी रुग्णालयात जाऊन आमदार जयकुमार गोरे यांची भेट घेतली. त्यानंतर त्यांनी माध्यमांना दिलेल्या प्रतिक्रियेत गोरे यांच्या प्रकृतीची माहिती दिली.

आर्काइव्हमधील सर्व बातम्या मोफत वाचण्यासाठी कृपया रजिस्टर करा

तानाजी सावंत म्हणाले, “काल अधिवेशन संपल्यावर आम्ही सर्वजण पुण्यात आलो. त्यानंतर आमदार जयकुमार गोरे रात्री पुण्याहून फलटणला निघाले. फलटणजवळ चालकाचं गाडीवरील नियंत्रण सुटलं आणि गाडी पुलाचे कठडे तोडून जवळपास ६० फूट खाली कोसळली. खासदार रणजितसिंह नाईक निंबाळकर ताबोडतोब येऊन मदतकार्य केलं.”

“आमदार गोरे यांच्या जीवाला कोणताही धोका नाही”

“सध्या आमदार जयकुमार गोरे यांची प्रकृती स्थिर आहे. आम्ही डॉक्टरांना सूचना दिल्या आहेत. आमदार गोरे यांच्यासह इतरांचीही तब्येत व्यवस्थित आहे आणि सुधारणा होत आहे. आमदार गोरे यांच्या जीवाला कोणताही धोका नाही, त्यांच्यावरील धोका टळलेला आहे,” असं तानाजी सावंत यांनी सांगितलं.

व्हिडीओ पाहा :

“गाडीबाबत मी माहिती घेतली नाही”

अपघातानंतर आमदार गोरेंच्या गाडीच्या एअर बॅग्ज उघडल्या नाही अशीही चर्चा आहे. याबाबत पत्रकारांनी आरोग्यमंत्री तानाजी सावंत यांना विचारलं. त्यावर ते म्हणाले, “गाडीबाबत मी माहिती घेतली नाही. मी केवळ आमदार जयकुमार गोरे यांच्या आरोग्याविषयी बोलेल.”

हेही वाचा : Jaykumar Gore Car Accident: “दादा वाचवा… वाचवा! बघा अपघात…”, अपघातानंतर काय घडलं? प्रत्यक्षदर्शीने सांगितला सविस्तर घटनाक्रम

“अगदी स्पष्ट सांगायचं तर गोरे यांच्या पत्नीने सांगितलं की, ते आज हसलेदेखील”

“मी आमदार गोरेंशी चर्चा केली. ते स्वतः माझ्याशी बोलले. अगदी स्पष्ट सांगायचं तर गोरे यांच्या पत्नीने सांगितलं की, ते चर्चा करताना आज हसलेदेखील. त्यांची तब्येत चांगली असल्याने त्यांना कोणताही धोका नाही. पुढील पाच ते सहा दिवसात ते आयसीयूतून बाहेर येतील,” अशी माहिती तानाजी सावंत यांनी दिली.

Pune News (पुणे न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Health minister tanaji sawant comment on accident of mla jaykumar gore pbs